უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინას ამ კვირას აშშ-ის პრეზიდენტის დონალდ ტრამპის გუნდის წევრები ეწვევიან. ინფორმაციას უკრაინული მედია ავრცელებს.
როგორც უკრაინის პრეზიდენტმა აღნიშნა, ახლა მნიშვნელოვანია, რომ უკრაინისა და აშშ-ის გუნდები პრაქტიკულ სამუშაოზე კონცენტრირდნენ და მთავარ მოვლენებზე საერთო ხედვა ჰქონდეთ ჩამოყალიბებული.
„ჩვენ ძალიან ბევრს ვიმუშავებთ. ამ კვირას პრეზიდენტ ტრამპის გუნდის წევრები ჩამოვლენ. სერიოზული ხალხია. უკრაინაში ჩემი გუნდის წევრები მათთან შეხვედრას, საუბარს გამართავენ, იმუშავებენ“, – ციტირებს მედია ზელენსკის.
ზელენსკის არ უთქვამს კონკრეტულად, თუ ვინ ჩამოდის უკრაინაში, თუმცა მანვე დასძინა, რომ მიუნხენის უსაფრთხოების კონფერენციაზე ის რიგ შეხვედრებს გამართავს, მათ შორის აშშ-ის ვიცე-პრეზიდენტთან ჯეი დი ვენსთან.