აშშ-ის სახელმწიფო მდივანმა მარკო რუბიომ განაცხადა, რომ ამერიკა საგარეო დახმარების გაცემაზე უარს არ ამბობს, თუმცა ეს პროცესი ეროვნული ინტერესების შესაბამისად რეორგანიზებას საჭიროებს.
„ვთვლი, რომ სწორი საგარეო დახმარება ქვეყნისთვის სარგებლის მომტანია, ის აუცილებლად სწორი უნდა იყოს“, – აღნიშნა რუბიომ.
მისი თქმით, იმის მტკიცება, რომ აშშ-მა საგარეო დახმარებაზე 40-60 მილიონი დოლარი უნდა დახარჯოს და მთელი ეს ფული სწორ მიმართულებებს მოხმარდება, აბსურდია. „ამ სახსრების ნაწილი არაეფექტურად იხარჯება“, – დასძინა რუბიომ.
როგორც აშშ-ის სახელმწიფო მდივანი აცხადებს, საჭიროა მთელი საგარეო დახმარების გადახედვა, რომლის უდიდესი ნაწილი USAID-ის მეშვეობით ვრცელდება, ხოლო ნაწილი – სახელმწიფო დეპარტამენტის გავლით.
„საჭიროა განისაზღვროს ის პროექტები, რომლებიც ჩვენს ეროვნულ ინტერესებს მხარს უჭერს და განისაზღვროს მათი დაფინანსების გაგრძელება. ამავდროულად, ჩვენ უნდა გავთავისუფლდეთ ისეთი პროექტებისგან, რომლებიც ფულის ტყუილი ხარჯვაა და ხანდახან ჩვენს ინტერესებს ეწინააღმდეგება“, – თქვა მან.
მისი განმარტებით, ახლა აშშ-მა საგარეო დახმარება მთლიანად შეაჩერა, რათა ყველა პროექტი გაანალიზდეს. ის პროექტები, რომელთა განხორციელებას აზრი არ აქვს, ლიკვიდირებული იქნება, ხოლო ის, რასაც სარგებელი მოაქვს, შენარჩუნდება და გაძლიერდება კიდეც.