დროშის დაწვის რიტუალისადმი ოპოზიციაში და მესამე სექტორში მოქმედი ორმაგი სტანდარტის შესახებ წერს სოციალურ ქსელში „ხალხის ძალის“ წევრი დავით ქართველიშვილი.
როგორც ის აღნიშნავს, ამერიკის დროშის დემონსტრაციული დაწვა რომელიმე საკრებულოს „ქართული ოცნების” წევრის მხრიდან თუ უმალ გამოიწვევდა რადიკალებისა და მათი მხარდამჭერების შეშფოთებას, დღეს ეს ქმედება რეაქციის გარეშეა დარჩენილი. როგორც ექსპერტი წერს, დღეიდან მსგავსი ქმედება უკვე „მოსულა”.
„გუშინ რუსთაველზე აშშ-ს დროშის „რიტუალური” დაწვის თაობაზე დუმს “„პროგრესიული” კაცობრიობა, დუმს „მესამე” სექტორი, დუმს აშშ-ს საელჩო. პრინციპში, სად მათი დროშის დაწვა და სად ევროკავშირის. საქმე იმაშია, რომ თვით ამერიკაშიც მსგავსი ქმედება – საკუთარი სახელმწიფო დროშის დაწვა – განიხილება, როგორც „კონსტიტუციის პირველი შესწორებით დაცული პროტესტის გამოხატულება”. 1989 წელს აშშ-ს უზენაესმა სასამართლომ „ტეხასი ჯონსონის წინააღმდეგ” საქმის განხილვის დროს დაადგინა, რომ „მსგავსი ქმედებები სიტყვის თავისუფლების გამოხატვის ერთ-ერთ ფორმას წარმოადგენენ”.
საქართველოში, რა თქმა უნდა, ამაზე ასევე ვრცელდება ორმაგი სტანდარტი: ამერიკის დროშის დემონსტრაციული დაწვა რომელიმე საკრებულოს „ქართული ოცნების” წევრის მხრიდან ჯერ კიდევ 2025 წლის 20 იანვრამდე მომენტალურად გამოიწვევდა შეშფოთებული მეთიუ მილერის აღშფოთებით სავსე ბრიფინგს “დემოკრატიის უკუსვლის” და „აგრესიული ანტიამერიკული რიტორიკის” თაობაზე, ხოლო აშშ-ს საელჩო „გაგვახარებდა” მორიგი ფილოსოფიური „ქარდით”.
დღეიდან კი, მსგავსი ქმედება უკვე „მოსულა”. ამას ვწერდი და გამახსენდა 90-იანი წლები, გარდაბანში ყოფნისას მომშივდა და რესტორან „გოლუბოი დუნაი”-ში მწვადი შევუკვეთე. მომზადებისას დავაკვირდი, რომ ავარვარებული ნახშირის სიმხურვალის მიუხედავად, ჩემს შამფურს პერიოდულად აჯდებოდნენ ბუზები. ამის შესახებ აზერბაიჯანელ მზარეულს რომ მივუთითე, მან დამაწყნარა: „ეთ ნეთ ფრაბლემ, ეთ ნაში მუხი!” – ანუ რესტორნისა არიანო და ეკოლოგიურად შემოწმებულები...” – წერს დავით ქართველიშვილი.