პარლამენტის იურიდიულ საკითხთა კომიტეტის თავმჯდომარის პირველი მოადგილე, თორნიკე ჭეიშვილმა საქართველოს აშშ-თან სამომავლო ურთიერთობაზე ისაუბრა გადაცემაში „იმედი LIVE“. ჭეიშვილმა აღნიშნა, რომ საქართველო არის ერთგვარი ტესტი და იქნება ლაკმუსის ქაღალდი იმასთან მიმართებით, თუ რამდენად შეძლებს პრეზიდენტი ტრამპი და მისი ადმინისტრაცია „დიფ სთეითის“ დამარცხებას.
„ძალიან მნიშვნელოვანია ღირებულებითი თანხვედრა, თუმცა საკითხი გაცილებით უფრო მრავალშრიანია და კომპლექსურ ანალიზის საჭიროებს. ჩვენ ძალიან კარგად ვხედავთ იმას, რომ თავად პრეზიდენტ ტრამპს შეერთებულ შტატებში ჰყავს არაერთი ოპონენტი, მათ შორის ფედერალურ დონეზე, ისევე როგორც სხვადასხვა შტატში. ბოლო დროის ამბავია თუნდაც ის, რომ ერთ-ერთი გუბერნატორი მაგალითად ერთგვარ დაუმორჩილებლობას უცხადებს მის პოლიტიკას კონკრეტულ საკითხთან დაკავშირებით და საკმაოდ მწვავე შეფასებები იყო თავად პრეზიდენტი ტრამპის მხრიდან გაკეთებული ამასთან დაკავშირებით.
საკუთრივ შტატებშიც ჯერ-ჯერობით პრეზიდენტი ტრამპი არის ძალიან სერიოზული გამოწვევების წინაშე. ჩვენ შეგვიძლია ყოველგვარი შელამაზების გარეშე ვისაუბროთ პირდაპირ „დიფ სთეითზე“, რომელიც შეიძლება ითქვას, უკვე ერთგვარ ლეგალურ ტერმინად ჩამოყალიბდა და ფორმულირებულია მას შემდეგ, რაც ამ ტერმინის მოხსენიება მოხდა სწორედ პრეზიდენტის ერთ-ერთ აღმასრულებელ განკარგულებაში.
„დიფ სთეითოს“ საცეცები, მისი ფესვები არის იმდენად ფართო, რომ პირველ ყოვლისა, შეერთებულ შტატებში საჭიროებს სათანადო გამკლავებას. შემდგომ უკვე ის მეტასტაზები, რომელიც შეიძლება იყოს გავრცელებული თუნდაც ევროკავშირში, ესეც ცხადია უნდა იყოს დამარცხებული და ჩვენ მაშინ შევძლებთ უკვე რაღაც ქმედით ერთობაზე საუბარს, როდესაც საქართველოსთან მიმართებით კონკრეტული რიტორიკა იქნება შეცვლილი.
ჯერჯერობით, ამ თვალსაზრისით რომ დავაკვირდეთ, უსამართლობის კასკადი სამწუხაროდ ჩვენს ქვეყანასთან მიმართებით გრძელდება, თუმცა რასაკვირველია, მეორე მხრივ ხელისუფლება უკვე არის სათანადო იმუნიტეტით აღჭურვილი, ისევე როგორც ჩვენი საზოგადოების უდიდესი ნაწილი ძალიან კარგად აფასებს ამ მოვლენებს და რა თქმა უნდა, ჩვენ ჩვენი ეროვნული პოლიტიკის გატარებით მზად ვართ იმისთვის, რომ დაველოდოთ იმ დროს, როდესაც შეერთებულ შტატებში „დიფ სთეითი“ იქნება შესუსტებული, დამარცხებული და როგორც დღეს აღინიშნა საქართველოს პრემიერ-მინისტრის მიერ, უკვე ამის შემდეგ შეიძლება სუფთა ფურცლიდან დავიწყოთ საუბარი ურთიერთობების ახალ ეტაპსა და სტრატეგიულ თანამშრომლობაზე.
საქართველო არის ერთგვარი ტესტი და იქნება ლაკმუსის ქაღალდი იმასთან მიმართებით, თუ რამდენად შეძლებს პრეზიდენტი ტრამპი და მისი ადმინისტრაცია „დიფ სთეითის“ დამარცხებას. ბუნებრივია ჩვენ ამ საქმეში მხოლოდ და მხოლოდ გულშემატკივრები შეგვიძლია ვიყოთ ბატონი ტრამპის“, – განაცხადა თორნიკე ჭეიშვილმა.