პარტია „ხალხის ძალის“ აღმასრულებელი მდივანი გურამ მაჭარაშვილი მედიასთან რუსეთ-უკრაინის ომის შესახებ ევროპელი ლიდერების განცხადებებს ეხმიანება. „უკრაინაში ომი ვის აწყობს და ვის არა ახლა გამოჩნდა“- განაცხადა დეპუტატმა და აღნიშნა, რომ ევროპის ქვეყნების, ბალტიისპირეთისა და დანიის ხელისუფლებების წარმომადგენლები ბოლო კვირების განმავლობაში ღიად აცხადებდნენ, რომ უკრაინაში ომის დასრულება არ სურთ, რადგან რუსეთის აგრესიის მათი მიმართულებით წასვლის საფრთხე იქნება.
პარლამენტის წევრის თქმით, სწორედ ამ მიზეზით აწყობს რიგ ქვეყნებს უკრაინაში ომის გაგრძელება და საქართველოში მეორე ფრონტის გახსნა. დეპუტატი საფრანგეთის პრეზიდენტის ემანუელ მაკრონის განცხადებასაც ეხმიანება. მისი თქმით, მაკრონმაც პირდაპირ განაცხადა, რომ უკრაინაში ომის დასრულების შემთხვევაში, მისი აზრით, რუსეთის აგრესია საფრანგეთსაც დაემუქრება.
„უკრაინაში ომი ვის აწყობს და ვის არა ახლა გამოჩნდა. განსაკუთრებით ბოლო კვირებში, როდესაც ევროპის ქვეყნების წარმომადგენლები, დანიის პრემიერი, ბალტიისპირა ქვეყნების პირველი პირები პირდაპირ ამბობენ, რომ მათ არ აწყობთ უკრაინაში მშვიდობის დამყარება, რადგან რუსეთიდან საფრთხე მათკენ წამოვა. რა თქმა უნდა, ისინი მომხრე არიან, რომ უკრაინაში ომი გაგრძელდეს და საქართველოში მეორე ფრონტი გაიხსნას. იმიტომ, რომ რუსეთი იქნება გადართული უკრაინაზე და ღმერთმა არ ქნას თუ საქართველოში მოახერხეს ამის გაკეთება [მეორე ფრონტის გახსნა] მაშინ, საქართველოზეც. უკვე მაკრონმაც კი დაადასტურა ეს. ნახეთ მისი გამოსვლა რას ემსახურებოდა? პირდაპირ ამბობს, რომ რუსეთისგან საფრთხე საფრანგეთმა არ უნდა იგრძნოს და მშვიდობა უკრაინაში არ უნდა დამყარდეს. რატომ? იმიტომ, რომ მერე რუსეთის რისხვა მათი აზრით წავა საფრანგეთისკენ, ბალტიისპირეთისკენ, დანიისკენ და ა.შ. რეზიუმე რომ გავაკეთოთ, ევროპის ქვეყნების ხელისუფლებების მიზანი არის ის, რომ სხვის ხარჯზე, ამ შემთხვევაში უკრაინელი ხალხის ხარჯზე, თავიანთ ქვეყანაში შეინარჩუნონ მშვიდობა,“- განაცხადა გურამ მაჭარაშვილმა.