არ მჯერა, რომ ოპოზიცია გაერთიანებას შეძლებს, მაგრამ თუ შეძლებს და სალომე იქნება მათი ლიდერი, ეს იქნება ჩამოკიდებული ლოდი მათზე, რომელიც დაქაჩავს ფსკერისკენ ოპოზიციას, რომელიც ისედაც ფსკერზეა, – განაცხადა პარლამენტის ვიცე-სპიკერმა, „ხალხის ძალის“ თავმჯდომარემ სოზარ სუბარმა გადაცემაში „იმედი LIVE“.
წამყვანმა მას ჰკითხა, რა პოლიტიკური მომავალი აქვს ქართულ ოპოზიციას.
„გახსოვთ ალბათ სალომე ზურაბიშვილი რომ გადადგა საგარეო საქმეთა მინისტრის პოსტიდან და გადავიდა ოპოზიციაში. გვახსოვს ათეულობით ათასი ადამიანი, რომელიც შეკრიბა იპოდრომზე. თავისი რეიტინგის პიკში იყო მაშინ. მაშინ ჯერ კიდევ არ იყო გაშიფრული, რომ ის იყო აგენტი, თუ მერე გახდა აგენტი, არ ვიცი, თუმცა დღეს ყველამ იცის. მაშინ ჰქონდა შეთავაზებები, რომ ვიღაცებთან ერთად გამოსულიყო თვითმმართველობის არჩევნებზე, მაგრამ თქვა, რომ დამოუკიდებლად მოიგებდა და არავინ სჭირდებოდა. არავინ გაიერთიანა და მთელი საქართველოს მასშტაბით სალომე ზურაბიშვილმა და მისმა პარტიამ „საქართველოს გზა“ მიიღო 1.5% მხარდაჭერა. ვერცერთ მუნიციპალიტეტში ვერ გაიყვანა ერთი ადამიანიც კი საკრებულოში. ჯერ ერთი, არ მჯერა, რომ ოპოზიცია გაერთიანებას შეძლებს, მაგრამ თუ შეძლებს და სალომე იქნება მათი ლიდერი, ეს იქნება ჩამოკიდებული ლოდი მათზე, რომელიც დაქაჩავს ფსკერისკენ ოპოზიციას, რომელიც ისედაც ფსკერზეა“, – აღნიშნა სუბარმა.