ყოფილი კანადელი სნოუბორდისტი და ოლიმპიური თამაშების მონაწილე რაიან უედინგი გამოძიების ფედერალურმა ბიურომ მსოფლიოს 10 ყველაზე ძებნილ დამნაშავეს შორის შეიყვანა. ამერიკის შეერთებული შტატების სახელმწიფო დეპარტამენტმა 10 მილიონი დოლარის ოდენობის ფულადი ჯილდო დააწესა ინფორმაციისთვის, რომელიც უედინგის დაკავებაში დაეხმარება.
რაიან უედინგი სოლტ ლეიკ სიტის 2002 წლის ოლიმპიადაზე პარალელურ გიგანტურ სლალომში გამოდიოდა და 24-ე ადგილი დაიკავა.
43 წლის მამაკაცი იძებნება ტრანსნაციონალური ნარკოქსელის ორგანიზებისთვის, რომლის მეშვეობითაც მას რეგულარულად გადაჰქონდა ასობით კილოგრამი კოკაინი კოლუმბიიდან კანადასა და აშშ-ში, აგრეთვე მრავალი ადამიანის მკვლელობისთვის.
„უედინგმა გაიარა გზა ოლიმპიადიდან კოკაინის გასაღებამდე. მისი კონკურენტების სავარაუდო მკვლელობები უედინგს ძალიან სახიფათო ადამიანად აქცევს“, – განაცხადა ლოს ანჯელესში გამოძიების ფედერალური ბიუროს დირექტორის მოადგილემ, აკილ დევისმა.