გურიაში დიდთოვლობით გამოწვეული სტიქიის სალიკვიდაციო სამუშაოები დასრულებულია.
ყველა ადმინისტრაციულ ერთეულთან დამაკავშირებელი გზა სრულად აღდგენილია. ასევე, ინტენსიურად იწმინდება შიდა სასოფლო და საუბნო გზები.
რეგიონს შეუფერხებლად მიეწოდება ბუნებრივი აირი და ელექტრო ენერგია. გრძელდება სტიქიით დაზარალებული მოქალაქეებისთვის ჰუმანიტარული დახმარების მიწოდება.
გურიის მხარეში სახელმწიფო რწმუნებულის, გიორგი ურუშაძის განცხადებით, სტიქიის შედეგად დაზიანებული სახლების აღდგენას სახელმწიფო უზრუნველყოფს, ხოლო ის მოქალაქეები, რომელთაც საცხოვრებელი დაკარგეს, ალტერნატიული საცხოვრებელი ფართით იქნებიან უზრუნველყოფილი.
„გურიის რეგიონში თოვლის საფარისგან გზების გაწმენდითი სამუშაოები ფაქტობრივად, უკვე დასრულებულია, ყველა სოფელთან დამაკავშირებელი ცენტრალური გზა სრულად გავლადია. გრძელდება საკვები პროდუქტების და მედიკამენტების დარიგება იმ ადამიანებისთვის, ვისაც ამის საჭიროება გააჩნიათ. მთელი რეგიონის მასშტაბით სრულად არის აღდგენილი ელექტროენერგიის და ბუნებრივი აირის მიწოდება.
საქართველოს პრემიერ-მინისტრის გადაწყვეტილებით, აქტიურად მუშაობს სტიქიით მიყენებული ზარალის დამთვლელი შესაბამისი კომისია და ყველა იმ ადამიანისთვის, რომელსაც დაუზიანდა საცხოვრებელი სახლი, სახელმწიფო სრულად უზრუნველყოფს მათ აღდგენას. ხოლო ადამიანები, რომლებმაც დაკარგეს საცხოვრებელი სახლები, უზრუნველყოფილნი იქნებიან ალტერნატიული საცხოვრებელი ფართებით”, – განაცხადა სახელმწიფო რწმუნებულმა.