ფოლკლორის ცენტრი 2025 წელს პრიორიტეტულ მიმართულებად სალოტბარო სკოლებს ასახელებს. საქართველოს სხვადასხვა რეგიონში მოქმედ სალოტბარო სკოლებში 2000-მდე მოსწავლე ქართულ მრავალხმიანობას, ტრადიციულ გალობას, ქორეოგრაფიას და ზეპირსიტყვიერებას სრულიად უსასყიდლოდ ეუფლება.
პირველი სკოლა საქართველოს კათოლიკოს-პატრიარქ ილია მეორეს კურთხევით და ანზორ ერქომაიშვილის ინიციატივით, ფოლკლორის სახელმწიფო ცენტრმა 2015 წელს გახსნა. დღეისათვის საქართველოს რეგიონებში უკვე 44 სალოტბარო სკოლა მოქმედებს.
„ჩვენი სალოტბარო სკოლების მოსწავლეთა ნახევარზე მეტი დგას ტაძარში შაბათ – კვირას და გალობს, მონაწილეობს ღვთისმსახურებაში. ეს მოხდა ჩვენი და ჩვენი სასულიერო პირების ერთობლივი ძალისხმევით და ბავშვების ინტერესით, იმიტომ რომ ტაძარში ვერ მიიყვან ბავშვს, თუ მას არ უნდა. ბოლო წელიწად ნახევარში 44 სკოლიდან 30 ღვთისმსახურებაში მონაწილეობს, გალობას ასრულებს იქ,სადაც მისი შესრულების ბუნებრივი ადგილია და რისთვისაც შეიქმნა ეს უნიკალური საგალობლები. ერთი სალოტბარო სკოლიდან შეიძლება ორ ტაძარში იდგნენ, ხუთი მოსწავლე ერთ, ხუთი მეორე ტაძარში. გალობის მიმართულებით ასევე დავაფუძნეთ ფესტივალი „გალობის მერცხლები”. ჩვენი ყველა სალოტბარო სკოლის მოსწავლე მონაწილეობს, ვირჩევთ რომელიმე დიდ ტაძარს და ვგალობთ ერთად”, – განაცხადა დღეს ფოლკლორის სახელმწიფო ცენტრის ხელმძღვანელმა გიორგი დონაძემ.