UFC-ის საშუალო წონის ქართველმა მებრძოლმა, რომან დოლიძემ იტალიელი მარვინ ვეტორი დაამარცხა. ხუთრაუნდიან ბრძოლაში 36 წლის მებრძოლმა მეტოქეს მსაჯთა ერთსულოვანი გადაწყვეტილებით სძლია.
ბრძოლის დასრულების შემდეგ რომან დოლიძემ მეტოქეს მადლობა გადაუხადა და აღნიშნა, რომ მისთვის ეს მნიშვნელოვანი ტესტი იყო.
„მინდა მარვინს დიდი მადლობა გადავუხადო, რადგან ის ჩემთან ბრძოლას დათანხმდა. ჩემთვის მნიშვნელოვანი ტესტი იყო. უმაღლეს დონეზე ვარ. ყველაფრისთვის მზად ვიყავი. ყველას დავანახე, რომ ხუთი რაუნდის განმავლობაში დაუღალავად ბრძოლა შემიძლია. ჩემს აგრესიას ვაკონტროლებდი, რაც გადამწყვეტი მომენტი იყო. ვფიქრობ, დავიმსახურე, რომ ჩემი შემდეგი მოწინააღმდეგე ტოპ 5-იდან იყოს, რობერტ ვიტეკერი ან ადესანია. მომეცით მათთან ბრძოლა, სხვა არაფერი მინდა“, – განაცხადა რომან დოლიძემ.