სტამბოლის მთავარმა პროკურატურამ განაცხადა, რომ ფინანსური დანაშაულების გამოძიების საბჭოს (MASAK) ანგარიშების საფუძველზე, მოითხოვა სამშენებლო კომპანიის დაყადაღება, რომელიც სტამბოლის მერის, ეკრემ იმამოღლუს ეკუთვნის და გაყინა მისი აქტივები.
„ეს ქვეყანა აღარ არის კანონიერი სახელმწიფო. ბოლო მოვლენები ამის ნათელი დადასტურებაა.
ეკრემ იმამოღლუს შევხვდი. კარგ ხასიათზეა. მას ჯერ განცხადება არ გაუკეთებია“,-
განაცხადა თურქეთის ადვოკატთა ასოციაციების კავშირის პრეზიდენტმა, ერინჩ საგკანიმ.
როგორც ადგილობრივი მედია წერს, თურქეთის ხელისუფლებამ ხაზგასმით აღნიშნა, რომ ყველა ქმედება კანონსა და სასამართლო გადაწყვეტილებებს შეესაბამება.
აღსანიშნავია, რომ მერის დაკავებით საფონდო ბირჟამ, ლირამ და ობლიგაციებმა მკვეთრი ზარალი განიცადა.
როგორც მედია იუწყება, იმამოღლუ, სავარაუდოდ, კვირას დასახელდებოდა “სახალხო რესპუბლიკური პარტიის” კანდიდატად თურქეთის მომავალ საპრეზიდენტო არჩევნებში.
ოპოზიციის თქმით, დაკავება პოლიტიკურად მოტივირებული იყო და განაცხადა, რომ მთავრობა ცდილობს მოხსნას პოტენციური პოლიტიკური საფრთხე ერდოღანისთვის.
მერის მხარდასაჭერი საპროტესტო აქცია გამართეს, სტამბოლის უნივერსიტეტის სტუდენტებმა და უნივერსიტეტის მიერ იმამოღლუს დიპლომის ბათილად ცნობა გააპროტესტეს. უნივერსიტეტთან შეკრებილ სტუდენტებსა და პოლიციას შორის დაპირისპირება მოხდა, რა დროსაც პოლიციამ რეზინის ტყვიები და ცრემლსადენი გაზი გამოიყენა.
შეგახსენებთ, სტამბოლის მერი და თურქეთის მთავარი ოპოზიციური „რესპუბლიკური სახალხო პარტიის“ წევრი, ექრემ იმამოღლუ პოლიციამ გუშინ კორუფციასთან და ტერორიზმთან სავარაუდო კავშირების შესახებ მიმდინარე გამოძიების ფარგლებში დააკავა.