ინვესტიციების მოცულობაზე თუ ვისაუბრებთ, ყაზახური ინვესტიცია საქართველოში 600 მლნ-ზე მეტია, მაგრამ (ამ მაჩვენებელს) საქართველო ნელ-ნელა ეწევა – ბოლო დროს ქართული ინვესტიცია ყაზახეთში 430 მლნ იყო, – განაცხადა ყაზახეთის რესპუბლიკის საგანგებო და სრულუფლებიანმა ელჩმა საქართველოში, მალიკ მურზალინიმ გადაცემაში „იმედი LIVE“.
მან ყაზახეთში განხორციელებულ ქართულ ინვესტიციებზე ისაუბრა. კერძოდ, გამოყო ორი ქართული კომპანია, რომლებიც იქ საკუთარ ბიზნესს ავითარებენ. ამასთან, ხაზი გაუსვა, რომ ქართული ბიზნესის წყალობით, ყაზახეთში ზეთისხილის ხეების გახარება დაიწყეს.
„ქართული ბიზნესის ინვესტიცია ყაზახეთის ეკონომიკაში ძალზედ დადებითი მოვლენაა, მაგრამ ახალი ფენომენია. მე მიხარია, რომ საქართველოსა და ქართულ ბიზნესს გააჩნია საშუალებები ისეთ ქვეყანაში ჩადოს ინვესტიციები, როგორიც არის ყაზახეთი, რადგან ისტორიულად ჩვენ უფრო დიდ ინვესტიციებს ვდებდით საქართველოში, როგორიც გახლავთ ბათუმის ნავთობგადამამუშავებელი ტერმინალი, ბათუმის საზღვაო პორტი, „ხალიკ ბანკი საქართველო“ და თუ შევჩერდებით „რომპეტროლ საქართველოზე“, ეს არის უზარმაზარი საწარმო – ნავთობპროდუქტების 17% მის ხელშია, რომელიც საქართველოში იყიდება. გადასახადების სახით ბიუჯეტში ამ კომპანიამ 50 მლნ დოლარი შეიტანა. ამ საწარმოს, „რომპეტროლის“ არსებობის განმავლობაში, სულ დაახლოებით, 800 მლნ აქვს ბიუჯეტში შეტანილი. სხვა საწარმოებიც არსებობს.
თუ ვისაუბრებთ კარგ ტენდენციაზე, რომელიც მე, როგორც ყაზახეთის ელჩს საქართველოში ძალიან მომწონს, ბოლო პერიოდში ქართულმა ბიზნესმა დაიწყო უფრო მეტი ინვესტიციის განხორციელება ყაზახეთში. ორ პროექტზე შევჩერდები. პირველი გახლავთ კომპანია „ჯორჯიან ინდასტრიალ გრუპ“ – მათ გააჩნიათ ყაზახეთის სხვადასხვა დარგში ძალიან დივერსიფიცირებული პორტფელი. ყველაზე დიდი პროექტია – სოფლის მეურნეობის ტექნიკის წარმოება. თქვენ იცით, ყაზახეთი დიდი აგრარული ქვეყანაა. ისინი მუდმივად ეძებენ სიახლეს და ბოლო პერიოდში განიხილავენ ძალიან კარგ ლოგისტიკურ პროექტს.
ასევე, ვფიქრობ, ქართველ ტელემაყურებლებს ეს დააინტერესებთ, მეორე გახლავთ „ჯორჯიან ოლივ კორპორეიშენის“ პროექტი. გასულ წელს მათ 10 ათასი ზეთის ხილის ნერგი დარგეს ყაზახეთში. არავის ეგონა, რომ ეს გამოვიდოდა. მე ბევრ ადამიანს ვესაუბრებოდი, ყველას პესიმისტური განწყობა ჰქონდა, მაგრამ ერთი მხრივ, ძალიან ღრმა სამეცნიერო მიდგომა იყო გამოყენებული და მეორე მხრივ, გამარჯვების რწმენა და ოპტიმიზმი ბატონი გიორგი სვანიძისა, რომელიც ქართული მხრიდან ამ პროექტს ხელმძღვანელობს. ამან თავისი საქმე გააკეთა. ყაზახეთის ერთ-ერთ რეგიონში, ზეთისხილს აყვავებას ბრწყინვალე მაჩვენებელი ჰქონდა. სულ კავშირზე ვარ ქართველ კოლეგებთან. 1 მლნ-მდე ავიყვანთ ნერგების რაოდენობასო – ბატონმა გიორგიმ მითხრა, რომელთანაც სულ კავშირზე ვარ.
მომავალში დაიწყება ქარხნის მშენებლობა, რომელიც ზეითუნის ზეთს აწარმოებს. ყაზახეთისთვის ეს გახლავთ სოფლის მეურნეობის ახალი დარგი. ჩვენ ხორბალს ვზრდით, ბევრი სხვა საინტერესო მიმართულება გაგვაჩნია, მაგრამ ზეთისხილზე არასდროს გვიმუშავია და იგი შემოვიდა ქართველების წყალობით. კლიმატი ჩვენთან უფრო ცივია, ვიდრე საქართველოში. ეს ხარისხზე ზეგავლენას ახდენს, ოღონდ დადებითად. ძალიან როდესაც ცივა, რა თქმა უნდა, ზეთისხილი ვერ იყვავილებს. ქართული ბიზნესის წყალობით შესაძლოა, ყაზახეთი გახდეს უკიდურესი ჩრდილოეთის ქვეყანა, სადაც ზეთისხილი ხარობს.
ინვესტიციების მოცულობაზე თუ ვისაუბრებთ, ყაზახური ინვესტიცია საქართველოში 600 მლნ-ზე მეტია, მაგრამ საქართველო ნელ-ნელა ეწევა – 430 მლნ იყო ქართული ინვესტიცია ბოლო დროს და ბრწყინვალე პერსპექტივები გააჩნია ორივე მიმართულებით საინვესტიციო პროცესს“, – განაცხადა მალიკ მურზალინიმ.
