კითხვა მინდა დავსვა, ვისი დაფინანსებით მოგზაურობს ბალტიის ქვეყნებში ქალბატონი სალომე? ვფიქრობ, რომ ეს კითხვა უნდა დაისვას და გაეცეს პასუხი და ამ პასუხში ჩვენ დავინახავთ მტკიცებულებას, ვისი მარიონეტი არის ექსპრეზიდენტი ზურაბიშვილი, – განაცხადა საქართველოს პარლამენტის თავმჯდომარემ შალვა პაპუაშვილმა.
მისი თქმით, ბოლო პერიოდში რადიკალების ლიდერების გახშირებული ვიზიტები ბალტიის ქვეყნებში იმ პოლიტიკის ნაწილია, რასაც ეს სამი ქვეყანა საქართველოს წინააღმდეგ ახორციელებს.
„რაც შეეხება ბალტიის ქვეყნებში ასე გახშირებულ ვიზიტებს, სამწუხაროა, რომ ამ სამ სახელმწიფოს, ევროკავშირის წევრს, ყოფილ საბჭოთა რესპუბლიკებს ასეთი მტრული დამოკიდებულება აქვთ ქართველი ხალხის და მისი ხელისუფლების მიმართ. ძალიან სამწუხარო არის ეს ყველაფერი, თუმცა ამის ახსნაც არსებობს. ბალტიის ქვეყნებს, ამ სამ ქვეყანას აქვს თავისი შიშები რუსეთთან დაკავშირებით და სამწუხაროდ ნაცვლად იმისა, რომ ამ შიშებს თავად გაუმკლავდნენ, მითუმეტეს ნატოს წევრი ქვეყნები არიან და არ ვიცი რისი ეშინიათ, ნაცვლად იმისა, რომ დადგნენ ამ შიშების პირისპირ, ცდილობენ სხვა ქვეყნების მეშვეობით აიცილონ რაღაც რისკები და ამ შემთხვევაში საქართველო ამ სამი ქვეყნის მოქმედი ხელისუფლებისთვის არის მხოლოდ ინსტრუმენტი, რათა ასე ვთქვათ საქართველოს მეშვეობით მოხდეს რუსეთის ყურადღების გადატანა სხვა საკითხებზე.
სამწუხაროა, რომ ასეთი დამოკიდებულება აქვთ ქართველ ხალხის მიმართ. მათთვის ამ სამი ხელისუფლებისთვის ქართველი ხალხი არის მხოლოდ ინსტრუმენტი საკუთარი თავიდან რისკების აცილებისა. ასე რომ ამის ნაწილია ის, რომ ექსტრემისტი პოლიტიკოსები არიან განსაკუთრებით ყურადღების ქვეშ ამ სამი ქვეყნიდან. ასევე იცით, რომ რადიკალური „ენჯეოები“ რეგისტრირდებიან ერთ-ერთ ქვეყანაში. ეს სამი ქვეყანა არის პირდაპირი განმახორციელებელი იმ ზრახვებისა, რომელიც საქართველოს წინააღმდეგ არსებობს“, – განაცხადა შალვა პაპუაშვილმა.