“ჩვენ და ისრაელი ძალიან ბევრი საკითხის მიმართ ვიზიარებთ ერთნაირ ხედვას, მათ შორის ხედვებს ამერიკის ახალი ადმინისტრაციის პოლიტიკასთან მიმართებით”

გამოვიდა, რომ ჩვენ და ისრაელი ძალიან ბევრი საკითხის მიმართ ვიზიარებთ ერთნაირ ხედვას, მათ შორის ხედვებს ამერიკის ახალი ადმინისტრაციის პოლიტიკასთან მიმართებით, – განაცხადა უზბეკეთში ჟურნალისტებთან გარემოს დაცვისა და ბუნებრივი რესურსების საპარლამენტო კომიტეტის თავმჯდომარემ, საპარლამენტო უმრავლესობის წევრმა მაია ბითაძემ.

„[ისრაელის პარლამენტის თავმჯდომარესთან] შეხვედრაზე ხაზი გაესვა იმ დაძაბულ გეოპოლიტიკურ ვითარებას, რომელიც მთელს მსოფლიოშია. ასევე, ხაზი გაესვა ეკონომიკური თანამშრომლობის მნიშვნელობას საქართველოსა და ისრაელს შორის. გამოვიდა, რომ ჩვენ და ისრაელი ძალიან ბევრი საკითხის მიმართ ვიზიარებთ ერთნაირ ხედვას, მათ შორის ხედვებს ამერიკის ახალი ადმინისტრაციის პოლიტიკასთან მიმართებით, რომლის მთავარი საყრდენია მსოფლიოში უსაფრთხოება“, – აღნიშნა ბითაძემ.

საქართველოს პარლამენტის თავმჯდომარის, შალვა პაპუაშვილის ხელმძღვანელობით, საპარლამენტო დელეგაცია 5-8 აპრილს საპარლამენტთაშორისო კავშირის (IPU) 150-ე ასამბლეის მუშაობაში მონაწილეობს, რომელიც უზბეკეთის დედაქალაქ ტაშკენტში იმართება. ვიზიტის ფარგლებში დაგეგმილია საქართველოს პარლამენტის თავმჯდომარის ასამბლეის სესიაზე სიტყვით გამოსვლა. ასევე, შალვა პაპუაშვილი გამართავს ორმხრივ შეხვედრებს პარლამენტების თავმჯდომარეებთან.