„მოდულში” დილის 7 საათიდან მიყვანილს, ღამის 12 საათამდე მაწამებდნენ, – განაცხადა „ნაციონალური მოძრაობის” რეჟიმის მიერ დაზარალებულმა, ნიკოლოზ ჯანჯალაშვილმა, რომელსაც ირაკლი ოქრუაშვილის „ქართულ პარტიასთან” კავშირს ედავებოდნენ, პარლამენტის დროებითი საგამოძიებო კომისიის სხდომაზე.
მისი თქმით, ელექტროშოკის გარდა, წამების ერთ-ერთი ხერხი წყლის ბოთლებით ცემა იყო. როგორც ჯანჯალაშვილმა აღნიშნა, სწორედ ამ ფიზიკური ანგარიშსწორების შედეგია, რომ მას ორი ოპერაცია დასჭირდა ხერხემალზე და ელენთაც ამოუღეს, ასევე, ციხეში ყოფნისას, ღვიძლზე B ჰეპატიტი დაემართა.
„ჩემი ძმის მეგობარმა მიცნო [მოდულში] და რომ იტყვიან, “მომიტაცა”და იმან ჩამიყვანა დაბლა, რომ კიდევ აღარ ვეცემე. იქ მუშაობდა და ნამდვილად არ მახსოვს არც სახელი, არც გვარი იმ პიროვნების. მიცნო და გამომარიდა, ხან ერთ ოთახში გამიყვანდნენ, ხან მეორეში.
[ელექტროშოკის გარდა] პლასტმასის წყლის ბოთლებით მცემდნენ. დაზიანება მაქვს ხერხემალზე, ორჯერ მაქვს ოპერაცია გაკეთებული, ღვიძლზე ციხიდან გამომყვა B ჰეპატიტი და მადლობა ისევ თქვენს ხელისუფლებას, რომ ამ ბე ჰეპატიტის პროგრამა შემოვიდა და მაგაში ჩამსვეს. მაგასთან ერთად, ელენთა დამიზიანეს ცემით და ელენთა მაქვს ამოღებული”, – განაცხადა ნიკოლოზ ჯანჯალაშვილმა, რომელმაც კომისიასთან კიდევ ერთხელ გაიმეორა, რომ ოქრუაშვილს მხოლოდ “ტელევიზორიდან იცნობს.”