განათლების სისტემა დაახლოებით 500-მა ადამიანმა დატოვა, – ამის შესახებ ვიცე-პრემიერმა, განათლებისა და მეცნიერების მინისტრმა ალექსანდრე ჯეჯელავამ უწყებაში განხორციელებული რეორგანიზაცია-ოპტიმიზაციის საკითხზე კომენტირებისას განაცხადა.
,,ეს პროცესი არანაირი ხარვეზებით არ მიმდინარეობდა. ყველაფერი კანონის სრული დაცვით მიმდინარეობდა. საია-ს სურვილი, რომ მათ ყველამ მიაწოდოს ინფორმაცია, მხოლოდ მათი სურვილია. ჩვენ როცა ჩავთვლით საჭიროდ და სასარგებლოდ, ამ შემთხვევაში მივაწვდით ინფორმაციას”, – განაცხადა ჯეჯელავამ.
მისივე თქმით, განათლების სისტემა დაახლოებით 500-მა ადამიანმა დატოვა.
,,ეს იყო ოპტიმიზაცია. ზოგი ფუნქცია მთლიანად შემცირდა. შევეცადეთ, რომ ე.წ. ბექოფისური, ანუ დამხმარე ფუნქციები შეგვემცირებინა, როგორიცაა მაგალითად, იურიდიული და აუდიტის სამსახურები და ამის ხარჯზე გაგვეძლიერებინა ფრონტალური განათლების ფუნქციები, პროფესიული, ზოგადი განათლებისა და უმაღლესი განათლების დეპარტამენტები”, – განაცხადა ჯეჯელავამ.
მისივე თქმით, ოპტიმიზაციის პროცესში ყველა ადმინისტრაციული ხარჯი 10%-ით შემცირდა.
„საქართველოს ახალგაზრდა იურისტთა ასოციაციამ“ დღეს რამდენიმე უწყებაში განხორციელებული რეორგანიზაციის შედეგები გამოაქვეყნა. საია- განცხადებით, რეორგანიზაციასთან დაკავშირებით მათ ინფორმაცია არ მიაწოდა შინაგან საქმეთა სამინისტრომ, იუსტიციის სამინისტრომ, განათლებისა და მეცნიერების სამინისტრომ, სოფლის მეურნეობის სამინისტრომ და გარემოსა და ბუნებრივი რესურსების სამინისტრომ.