ოპოზიციის წარმომადგენლები სამართლებრივი სივრციდან არიან გასული, მათი ყველანაირი ქმედება არის დანაშაულებრივი, – განაცხადა გადაცემაში „დღის ქრონიკა“ თავდაცვისა და უშიშროების კომიტეტის თავმჯდომარის პირველმა მოადგილემ თენგიზ შარმანაშვილმა ოპოზიციის არჩევნებში მონაწილეობაზე და „ნაციონალური მოძრაობის“ აკრძალვაზე საუბრისას.
„ძალადობრივად უნდათ ხელისუფლების შეცვლა საქართველოში და მთელი მათი ქმედებები ამაზეა აგებული. საკონსტიტუციო სასამართლოში სარჩელის შეტანა არ ნიშნავს, რომ ეს გადაწყვეტილება უკვე მიღებულია. მათ უნდა აირჩიონ სამართლებრივი გზები. ჯერ იდავონ საკონსტიტუციო სასამართლოში, ჩვენ ხომ წინასწარ არ ვიცით საკონსტიტუციო სასამართლო რა გადაწყვეტილებას მიიღებს და მიჰყვნენ შესაბამის კანონიერ პროცედურებს. ისინი რომ საქართველოს კანონმდებლობის და კონსტიტუციის ჩარჩოებში ყოფილიყვნენ მთელი ამ პერიოდის განმავლობაში, საქმე აქამდეც არ მივიდოდა, ასე არ გართულდებოდა, მაგრამ მათ ეს გზა აირჩიეს.
ეს მათი სადარდებელი და მათი პასუხისმგებლობაა. მე ვურჩევდი, რომ სამართლებრივ ჩარჩოებს დაუბრუნდნენ და მეტი შანსი ექნებათ, რომ სამართლებრივ სახელმწიფოში სამართლებრივი წესებით იმოქმედონ. თუ ისევ გააგრძელებენ დესტრუქციულ ქმედებებს, შედეგებიც შესაბამისი იქნება. ეს არჩევანი ჩვენ არ გაგვიკეთებია. განცხადებები მათი უფლებამოსილების შეწყვეტის შესახებ პარლამენტში ჩვენ არ დაგვიწერია, თავად დაწერეს. ეს არჩევანი მათია და არა ჩვენი“, – აღნიშნა თენგიზ შარმანაშვილმა.