აზერბაიჯანი საქართველოსთვის მნიშვნელოვანი მეზობელი და სტრატეგიული პარტნიორია. ის, რომ პირველი ოფიციალური ვიზიტი ხორციელდება აზერბაიჯანში, არის იმ პარტნიორობის ხაზგასმა, რომელიც საქართველოს და აზერბაიჯანს გააჩნიათ, – ამის შესახებ საქართველოს საგარეო საქმეთა მინისტრის პირველმა მოადგილემ, ლაშა დარსალიამ განაცხადა.
დარსალიას თქმით, აზერბაიჯანში საქართველოს პრეზიდენტის ვიზიტის ფარგლებში შეხვედრები გაიმართება პრეზიდენტთან და ქვეყნის სხვა ლიდერებთან, რომლის ფარგლებშიც განხილული იქნება ორმხრივი თანამშრომლობის საკითხები.
„განხილული იქნება ის მნიშვნელოვანი მიმართულებები, რომელიც არის ჩვენი სტრატეგიული პარტნიორობის საფუძველი. დაახლოებით 30 წლის უკან, როცა ჩვენი თანამედროვე რესპუბლიკები იწყებდნენ თავიანთი დამოუკიდებლობის გზას, სწორედ ის ფუნქცია, რომელიც დღეს აქვს ჩვენს ქვეყანას, მთლიანად რეგიონს, იყოს ხიდი დასავლეთსა და აღმოსავლეთს შორის, არის დღესაც კიდევ უფრო აქტუალური. ცენტრალური დერეფანი, გინდათ შუა დერეფანი, როგორც დღეს უწოდებენ, კიდევ უფრო მნიშვნელოვანი ხდება მთელი ჩვენი რიგი პარტნიორებისთვის. შესაბამისად, რა თქმა უნდა, ეს ერთ-ერთი მიმართულება არის აზერბაიჯანსა და საქართველოს შორის მსჯელობის“, – განაცხადა დარსალიამ.