ჩრდილოეთ კორეამ რუსეთს 6 მილიონამდე საარტილერიო ჭურვი გადასცა, რის გარეშეც მოსკოვი უკრაინაში ასეთ ინტენსიურ ომს ვერ აწარმოებდა. ინფორმაციას Reuters-ი ღია წყაროების ცენტრზე (OSC) დაყრდნობით ავრცელებს.
აღნიშნული მონაცემები დასტურდება რუსული საარტილერიო ანგარიშგებით, რომელიც უკრაინულ მხარეს ხელში ჩაუვარდა, თანამგზავრის მიერ გადაღებული ფოტოებითა და სოციალურ ქსელში ვერიფიცირებული ვიდეოებით.
Reuters-ის ცნობით, აღნიშნული ინფორმაცია აგრეთვე დაადასტურა სამმა უკრაინელმა მაღალჩინოსანმა მთავრობასა და ჯარში.
როგორც სააგენტო იუწყება, 2024 წელს სხვადასხვა ცალკეული რუსული საჯარისო შენაერთები უმეტეს წილად ჩრდილოკორეულ ჭურვებს იყენებდნენ. ზოგ შენაერთში ჩრდილოკორეული შეიარაღების გამოყენება 100% ხდებოდა.
ღია წყაროების ცენტრმა 64 რეისი შეისწავლა და დაადგინა, რომ 2023 – 2025 წლებში ჩრდილოეთ კორეიდან რუსეთში თითქმის 16 ათასი კონტეინერი გაიგზავნა, რომლებშიც მილიონობით საარტილერიო ჭურვი იყო.
ცენტრის ცნობით, მხოლოდ 2023 წელს ჩრდილოეთ კორეიდან რუსეთში 6 ათასზე მეტი კონტეინერი გაიგზავნა, რომლებშიც დაახლოებით 2,5 მილიონი საარტილერიო ჭურვი იყო. მათი კალიბრი 122 და 152 მილიმეტრი იყო.