„უკვე 2 თვეზე მეტია, თითქმის ყოველდღიურად აქ მოსული ადამიანები საუბრობენ წამებაზე. მაქვს სურვილი, გამოეხმაუროს ევროკავშირის ელჩი ამ კომისიის სხდომებზე იმ მსხვერპლების განცხადებებს, რომლებიც მართლა წამებას აღწერენ“- განაცხადა პარლამენტის დროებითი საგამოძიებო კომისიის სხდომაზე კომისიის წევრმა, გურამ მაჭარაშვილმა.
მაჭარაშვილი ასევე ახალგაზრდებს მიმართავს, რომ მოისმინონ კომისიის სხდომებზე განხილული საკითხები და ჰქონდეთ რეაგირება.
„მე მინდა კიდევ ერთხელ ჩვენ ახალგაზრდებთან ერთად, უცხოელ პარტნიორებს და ელჩებს მივმართო, რომლებიც ხშირად გვიწუნებენ ხოლმე დემოკრატიას და არა ერთხელ რეზოლუციაშიც ახსენეს და კომენტარებშიც, რომ თითქოს ნაწამები იყო პატიმარი სააკაშვილი. ამ სხდომებს ხომ უყურებენ? უკვე 2 თვეზე მეტია, თითქმის ყოველდღიურად აქ მოსული ადამიანები საუბრობენ წამებაზე. არ აქვს მნიშვნელობა ქონება დაკარგა, თანამდებობიდან გაათავისუფლეს, პოლიტიკურად დევნილი იყო თუ ა.შ. საბოლოო ჯამში ყველა ფაქტი მიდიოდა ციხეზე, წამებაზე. ამიტომ, მაქვს სურვილი, გამოეხმაუროს ევროკავშირის ელჩი ამ კომისიის სხდომებზე იმ მსხვერპლების განცხადებებს, რომლებიც არიან პირველწყაროები, რომლებიც მართლა წამებას აღწერენ და ეს დადასტურებულია საერთაშორისო სასამართლოს და ქართული მართლმსაჯულების ფაქტებით და რაც მთავარია საზოგადოების მიერ. ახალგაზრდებმა, რომლებიც ელჩების განცხადების საფუძველზე ვითომ აპროტესტებენ ვითომ დემოკრატიის უკუსვლას, ეს მოისმინონ და ამაზე გააკეთონ რეაგირებები“-განაცხადა გურამ მაჭარაშვილმა.