უკრაინაში ხელისუფლების მონოპოლიზება ხდება, რაც აიხსნება იმით, რომ ქვეყანაში საომარი მდგომარეობაა. სტატიას ამ შინაარსით The Economist-ი ავრცელებს.
„უკრაინისთვის ყველაზე მოწყვლადი საკითხი არა სამხედრო, არამედ პოლიტიკურია. ომის დაწყების დღიდან ბევრი ლიბერალურად განწყობილი და ზომიერი უკრაინელი დილემის წინაშე აღმოჩნდა: მთავრობის არაკომპეტენტურობაზე, კორუფციასა და არაეფექტურ მმართველობაზე საუბარმა, შესაძლოა, ქვეყნის საერთაშორისო მხარდაჭერას ძირი გამოუთხაროს. მაგრამ ამაზე თვალის დახუჭვა ზელენსკის მზარდი მონოპოლიის მიღებას ნიშნავს, რაც სახელმწიფოს ეფექტურობას ამცირებს“, – აღნიშნულია სტატიაში.
როგორც გამოცემა წერს, ბევრი უკრაინელი ფიქრობს, რომ ქვეყნის ყოფილი პრეზიდენტის, პეტრო პოროშენკოს წინააღმდეგ სანქციების შემოღება „სახიფათო პრეცედენტია“, რადგან ეს, საბოლოო ჯამში, ზელენსკის ყველა პოლიტიკურ ოპონენტს შეეხება.
„ხელისუფლების კონცენტრაცია – ომის ბუნებრივი შედეგია. მაგრამ უკრაინის ზოგი მომხრე სულ უფრო გამოხატავს შეშფოთებას, რომ ეს, შესაძლოა, შორს წავიდეს. სიმართლეა, რომ უკრაინული დემოკრატია კანონის უზენაესობას არასდროს ეყრდნობოდა. მისი პლურალიზმი რეგიონების მრავალფეროვნებით, გავლენიანი ჯგუფების ცალკეული ინტერესებით და აქტიური სამოქალაქო საზოგადოებით იყო განპირობებული, რომლებიც, თავის მხრივ, დასავლურ საელჩოებსა და მედიას ეყრდნობოდნენ. მაგრამ ახლა ყველა ეს შემაკავებელი ფაქტორი სუსტდება ან საერთოდ უქმდება“, – აღნიშნავენ სტატიის ავტორები.