ირანსა და აშშ-ს შორის მოლაპარაკებების შემდეგ, ომანის სულთანი რუსეთის პრეზიდენტს, ვლადიმერ პუტინს მოსკოვში შეხვდება, – ამის შესახებ ადგილობრივი მედია წერს.
ომანის სულთანი ჰაითამ ბინ ტარიკ ალ-საიდი მოსკოვში 21 აპრილს ჩავა, 22 აპრილს კი რუსეთის პრეზიდენტს შეხვდება.
კრემლში განცხადეს, რომ ომანის სულთანის შეხვედრები რეგიონულ და გლობალურ საკითხებზე თანამშრომლობაზე იქნება ფოკუსირებული, თუმცა დამატებითი დეტალები არ დაუზუსტებიათ. ამასთან, კრემლის ცნობით,ლიდერები სავაჭრო და ეკონომიკურ თანამშრომლობას განიხილავენ.
ამჟამად რომში ამერიკის შეერთებულ შტატებსა და ირანს შორის რიგით მეორე არაპირდაპირი მოლაპარაკებები მიმდინარეობს.
მეორე რაუნდის გამართვამდე ერთი დღით ადრე, ირანის საგარეო საქმეთა მინისტრი აბას არაღჩი მოსკოვში იმყოფებოდა, სადაც რუს კოლეგას, სერგეი ლავროვს შეხვდა. შეხვედრის შემდეგ სერგეი ლავროვმა განაცხადა, რომ მოსკოვი მზად არის, ხელი შეუწყოს ვაშინგტონსა და თეირანს შორის შეთანხმებას, იმ პირობით, რომ გათვალისწინებული იქნება ირანის კანონიერი ინტერესები.