26 მაისის დარბევის ფოტოები ყველა წამყვან გაზეთში იყო გამოქვეყნებული და სააკაშვილი, რომელიც მილიონებს იხდიდა პიარში, საკუთარი თავის ქება-დიდებაში, მიხვდა, რომ რამდენიმე სურათითა და ამ მოვლენით გაშიშვლდა, – განაცხადა ფოტოგრაფმა, გიორგი აბდალაძემ გადაცემაში „იმედი LIVE“.
მისი თქმით, 26 მაისის დარბევის ფაქტი ერთადერთი და ყველაზე გამორჩეულია, რადგან ის დასჯის სპეცოპერაცია იყო და მოსახლეობას არ მიეცა საშუალება, სიტუაციას განრიდებოდა.
„ხელშეკრულები მიწაზე ჰყავდათ გაჩერებული და კიდევ უარესად სცემდნენ. ეს იყო სპეცოპერაცია იმისთვის, რომ დაეშინებინათ მოსახლეობა. თითქმის, ყველას თავი ჰქონდა დახეთქილი – ქალი, კაცი, დიდი, პატარა, არსებითი მნიშვნელობა არ ჰქონდა.
ჩვენ შევძელით რეპორტაჟის გაკეთება, საკმაოდ რთული იყო მუშაობა 26 მაისს, რადგან პირველ რიგში, ჟურნალისტებზე ნადირობდნენ. უამრავი ჟურნალისტი – „ასავალ-დასავლის“ ჟურნალისტები იყვნენ ნაცემი, საერთაშორისო მედიის უამრავი წარმომადგენელიც იყო ნაცემი. ჩვენ გაგვიმართლა, რაღაც მომენტში შევძელით, გავრიდებოდით სიტუაციას. საპატიმროში ყოფნის პერიოდში შევიტყვე, რომ თურმე, მე გადამიღია ის ადამიანი, რომელიც შემდეგ სახურავზე გარდაცვლილი აღმოაჩინეს“, – განაცხადა აბდალაძემ.
მისივე თქმით, გავრცელებულმა ფოტოებმა მაშინდელი ხელისუფლების გაღიზიანება გამოიწვია.
„რეალურად ჩვენ ვაჩვენეთ, თუ რა მძიმე მდგომარეობა იყო იმ მომენტში საერთაშორისო მედიაში – ეს ფოტოები ყველა წამყვან გაზეთში იყო გამოქვეყნებული და სააკაშვილი, რომელიც მილიონებს იხდიდა პიარში, საკუთარი თავის ქება-დიდებაში, მიხვდა, რომ რამდენიმე სურათითა და ამ მოვლენით გაშიშვლდა და რეალური სახე ვაჩვენეთ. ეს ამბავი პირადად მას შეეხო. ეს უკვე გადმოცემით ვიცით სხვადასხვა კოლეგისგან, როდესაც საპატიმროდან გავთავისუფლდით, რომ ერთ-ერთ საერთაშორისო შეხვედრაზე 26 მაისის ეს ფოტოები აჩვენეს, რამაც მასში გაღიზიანება გამოიწვია და ბრძანება გასცა, ყველა ფოტოგრაფი, რომელიც იმ დღეს მუშაობდა, დაეპატიმრებინათ“, – განაცხადა აბდალაძემ.
მისივე თქმით, თავდაპირველად 5 ფოტოგრაფი იყო დაპატიმრებული, თუმცა შაჰ აივაზოვი, რომელიც „ასოშეიტედ პრესის“ კორესპონდენტი იყო, აშშ-ის საელჩოს ჩარევის შედეგად, იმ დღესვე გაათავისუფლეს.
პარლამენტის დროებითი საგამოძიებო კომისიის სხდომაზე გიორგი აბდალაძეს 30 აპრილს მოუსმინეს, რომელზეც ე.წ. ფოტოგრაფების საქმე განიხილეს.
სააკაშვილის რეჟიმის სამართალდამცველებმა ოთხი ფოტორეპორტიორი 2011 წლის 7 ივლისს, ჯაშუშობის ბრალდებით დააკავეს. მათ შორის იყვნენ ევროპის პრეს ფოტოსააგენტო ,,ეპას“ ფოტორეპორტიორი ზურაბ ქურციკიძე, საქართველოს საგარეო საქმეთა სამინისტროს ფოტორეპორტიორი გიორგი აბდალაძე, საქართველოს პრეზიდენტის ადმინისტრაციის ფოტორეპორტიორი ირაკლი გედენიძე და მისი მეუღლე, რედაქცია ,,პრაიმ ტაიმის“ ფოტორედაქტორი ნათია გედენიძე.
ახალი ხელისუფლების პირობებში საქმეზე ხელახალი გამოძიება ჩატარდა, დაიკითხნენ მოწმეები. პროკურატურამ ე.წ. ფოტოგრაფების საქმე 2016 წელს გახსნა. უწყების განცხადებით, ფოტოგრაფები ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა.
2018 წლის 22 ნოემბერს სააპელაციო სასამართლომ ჯაშუშობის ბრალდებით გასამართლებული ფოტოგრაფები გიორგი აბდალაძე, ზურაბ ქურციკიძე, ნათია და ირაკლი გედენიძეები გაამართლა.
2023 წელს საქალაქო სასამართლომ ჯაშუშობის საქმეზე გამართლებული ფოტოგრაფებისთვის მორალური ზიანის ანაზღაურების გადაწყვეტილება მიიღო.