“ჩვენ ყველანაირად უნდა ვეცადოთ, რომ მთელ მსოფლიოს ჰქონდეს სწორი ინფორმაცია საქართველოსა და ჩვენი პოზიციების შესახებ”

პარტია „ხალხის ძალის“ საგარეო ურთიერთობათა მდივანი ეკა სეფაშვილი MEGOBARI აქტს მედიასთან ეხმიანება. დეპუტატი აღნიშნავს, რომ აშშ-სთან ურთიერთობების გადატვირთვასთან დაკავშირებით ოპტიმიზმის საფუძველი არსებობს. მისი განმარტებით, აშშ-ს მხრიდან საქართველოს მიერ პარტნიორული ურთიერთობების გადატვირთვის ინიციატივაზე დაგვიანებული პასუხი მსოფლიოში არსებულ მღელვარე პერიოდს უკავშირებდა.

მნიშვნელოვანია ის ფაქტი, რომ ჩვენი სახელმწიფოს, მმართველი გუნდის და ქართველი ხალხის უმრავლესობის ფასეულობები და ღირებულებები ერთი ერთში ემთხვევა ტრამპის ადმინისტრაციის მიდგომებს, ძალიან მნიშვნელოვან საკითხებთან დაკავშირებით, – განაცხადა ეკა სეფაშვილმა და აღნიშნა, რომ ღირებულებების მსგავსება არის პარტნიორული ურთიერთობების ფუნდამენტი.

„აშშ-სთან ურთიერთობების გადატვირთვასთან დაკავშირებით ოპტიმიზმის საფუძველი ნამდვილად არსებობს. უკუკავშირის დაგვიანება საქართველოს მიერ გამოხატულ მზადყოფნასთან დაკავშირებით, რომ დაიწყოს ურთიერთობები ახალი ფურცლიდან და მოხდეს ურთიერთობების გადატვირთვა, თვისებრივად ახალ საფეხურზე პარტნიორობის ასვლა – ეს, ჩემი აზრით გამოწვეულია იმით, რომ დღეს მსოფლიოში ნამდვილად არის მნიშვნელოვანი გლობალური უსაფრთხოების გამოწვევები. მთელი მსოფლიო არის მღელვარე პერიოდში და ყურადღების კონცენტრირება, ძირითადად, უფრო სხვა თემებზე ხდება, ვიდრე საქართველოზე. თუმცა ოპტიმიზმის საფუძველი რამდენიმე გარემოება შეიძლება იყოს.

პირველ რიგში, მე ხაზგასმით მინდა აღვნიშნო ლევან დავითაშვილის ვიზიტი, რომელიც ძირითადად ეკონომიკურ საკითხებს შეეხებოდა, მაგრამ ეკონომიკური საკითხები არის იმ პრაგმატული საფუძვლების ყველაზე ძლიერი ბირთვი, რის გარშემოც შეიძლება განვითარდეს მომავალი ეკონომიკური, კულტურული, სოციალური თუ ა.შ ურთიერთობები. ეს ვიზიტი იყო წარმატებული და მე ვფიქრობ, ეს არის ძალიან კარგი საწყისი წერტილი.

გარდა ამისა, მნიშვნელოვანია ის ფაქტი, რომ ჩვენი სახელმწიფოს, მმართველი გუნდის და ქართველი ხალხის უმრავლესობის ფასეულობები და ღირებულებები ერთი ერთში ემთხვევა ტრამპის ადმინისტრაციის მიდგომებს, ძალიან მნიშვნელოვან საკითხებთან დაკავშირებით. ეს არის ის საერთო ფუნდამენტი, საიდანაც ძალიან მნიშვნელოვანია ჩვენი ერთობლივი სვლა ურთიერთშემხვედრი და ურთიერთსასარგებლო ურთიერთობებისკენ.

მე ვფიქრობ, რომ უნდა შევინარჩუნოთ მშვიდი და გონივრული პოლიტიკა და აბსოლუტურად სწორად მიმაჩნია, როდესაც ჩვენ, სხვადასხვა გზებით, იქნება ეს ღია წერილი თუ საქართველოს პარლამენტის მიერ გამოქვეყნებული განცხადება, MEGOBARI აქტთან დაკავშირებით, მოვახდინოთ ამა თუ იმ საკითხის რეალურ ჭრილში წარმოჩენა და არა ისე, როგორც აქამდე სხვადასხვა საშუალებებით, მოსყიდული თუ მიკერძოებული პოლიტიკოსები აჟღერებდნენ საერთაშორისო პრესაში თუ სხვადასხვა აქტორების საშუალებით. ასე რომ, ოპტიმიზმის საფუძველი ნამდვილად არის.

ჩვენ ყველანაირად უნდა ვეცადოთ, რომ მსოფლიოს, იქნება ეს აშშ, ჩვენი პარტნიორები, დასავლეთის სახელმწიფოები თუ სხვა, ჰქონდეთ მაქსიმალურად სწორი, ბევრი ინფორმაცია საქართველოსა და ჩვენი პოზიციების შესახებ“, – განაცხადა ეკა სეფაშვილმა.