2008 წლის განმავლობაში მამია სანადირაძემ შეძლო მოეზიდა ინვესტორები და შავ ზღვაში ჩადო ინტერნეტ კაბელი. ეს იყო უნიკალური კაბელი, რომელიც მაშინ თუ არ ვცდები სინგაპურს აკავშირებდა ვიღაცასთან და იყო შავ ზღვაში ჩადებული. ბევრი იწვალა, გააკეთა, ძალიან წარმატებული პროექტი აღმოჩნდა, მაგრამ ფოთამდე რომ მოვიდა, ფოთიდან-თბილისამდე უკვე დაკავშირება აუკრძალა „ნაციონალურმა მოძრაობამ“, ხელისუფლებამ, მთავრობამ. ალბათ ვიღაცა იყო დაინტერესებული, ცხადია ამის გარეშე არაფერი არ კეთდებოდა. შესაბამისად ეს პროექტი შეჩერდა, – განაცხადა ჟურნალისტმა გიორგი იაკობაშვილმა, მედიისა და გამოხატვის თავისუფლების უხეში დარღვევის ფაქტების შესახებ საუბრისას, პარლამენტის დროებითი საგამოძიებო კომისიის სხდომაზე.
როგორც მან აღნიშნა, ამ პროექტით საქართველო ინტერნეტის თვალსაზრისით ხდებოდა დამოუკიდებელი და დიდ სახელმწიფო შემოსავალთან იყო დაკავშირებული.
„თუმცა „კავკასუსმა“ მაინც მოახერხა და ამის პრეზენტაცია გააკეთა, იმიტომ, რომ სამომავლოდ თვლიდა, რომ როცა იქნებოდა, ეს ყველაფერი ჩაირთვებოდა. თან გაითვალისწინეთ ის ამბავი, რომ მოლაპარაკებებიც იყო დასრულებული აზერბაიჯანთან, საქართველოს საშუალებით ინტერნეტი უნდა მიწოდებულიყო ცენტრალური აზიის სახელმწიფოებში, მოლაპარაკებები დასრულებული იყო სომხურ მხარესთან, ირანში უნდა მიგვეწოდებინა ინტერნეტი და ფაქტობრივად ჩვენ ინტერნეტის თვალსაზრისით ვხდებოდით დამოუკიდებლები, როგორც რუსეთისგან, ასევე თურქეთისგან და პირიქით ჩვენზე დამოკიდებულები, კარგი გაგებით ვამბობ მე ამას, ჩვენზე დამოკიდებულები ხდებოდნენ სხვა ქვეყნები. ეს რა თქმა უნდა დიდ სახელმწიფო შემოსავლებთან იყო დაკავშირებული და ამ ყველაფრის ფონზე და იმის გათვალისწინებით, რომ მაშინ სააკაშვილი ყოველი ჯიხურის გახსნაზე მიდიოდა და ეს შუქდებოდა როგორც საქართველოს ეკონომიკური წინსვლის რაღაც მაგალითი, წარმოიდგინეთ, რომ არც სააკაშვილი და არც პრემიერ- მინისტრი, ის კი არა ეკა შარაშიძე იყო მაშინ ეკონომიკის მინისტრი, უბრალოდ მთავარი სპეციალისტიც კი არ გამოუგზავნიათ ამხელა პროექტის პრეზენტაციაზე. მაშინ მე დავასკვენი, რომ „კავკასუს ონლაინის“ თავზე შავი ღრუბლები თავს იყრიდა“, – განაცხადა გიორგი იაკობაშვილმა.