შინაგან საქმეთა მინისტრის მოადგილემ ალექსანდრე დარახველიძემ საქალაქო სასამართლოსთან გუშინ კონკრეტული პირების დაკავების დეტალებზე მედიასთან ისაუბრა.
„საზოგადოებამ ნახა სხვადასხვა სოციალური ქსელით, რომ დაკავების დროს კონკრეტული პირების მხრიდან ადგილი ჰქონდა წინააღმდეგობის გაწევას. ერთ შემთხვევაში ვნახეთ, რომ პოლიციელებს ყავაც კი შეასხეს. შესაბამისად, მოხდა მათი ადმინისტრაციული წესით დაკავება და დაწყებულია შესაბამისი წარმოება. რაც შეეხება დაზიანებებს, აღნიშნულის თაობაზე დაუყოვნებლივ მიეწოდა ინფორმაცია სპეციალურ საგამოძიებო სამსახურს. ეს დაზიანებები გამოწვეული იყო კონკრეტულ შემთხვევაში პროპორციული ძალის გამოყენების შედეგად თუ ადგილი ჰქონდა სხვა ტიპის გადაცდომას, გამოძიების შესწავლის საგანს წარმოადგენს. როგორც კი მოთავსდნენ დროებითი მოთავსების იზოლატორში, მათ ჰქონდათ საშუალება, ექიმთან დაეფიქსირებინათ აღნიშნული დაზიანების შესახებ პრეტენზია”, – განაცხადა მინისტრის მოადგილემ.