ჩვენ ბედნიერი ვართ, რომ გვაქვს დამოუკიდებელი ქვეყანა, რომელზეც რა თქმა უნდა ძალიან დიდი პასუხისმგებლობა აქვს თითოეულ ჩვენგანს, რომ ამ ქვეყნის დამოუკიდებლობა, მშვიდობაა და წინსვლა შევინარჩუნოთ, – განაცხადა „ქრონიკასთან“ ეკონომიკისა და მდგრადი განვითარების მინისტრმა ლევან დავითაშვილმა. მან მოქალაქეებს საქართველოს დამოუკიდებლობის დღე მოულოცა.
„სრულიად საქართველოს ვულოცავ დამოუკიდებლობის დღეს. თითოეულ ქართველს, ჩვენი ქვეყნის მოქალაქეს ვუსურვებ ბედნიერ, წარმატებულ მშვიდობიან და გამარჯვებულ ქვეყანაში ცხოვრებას. ჩვენთვის ეს არის განსაკუთრებული დღე, დამოუკიდებლობის დღე, იმიტომ რომ ძალიან ბევრი ერი იბრძვის დამოუკიდებლობისთვის და ისწრაფვის დამოუკიდებლობისთვის. საქართველოც საუკუნეების განმავლობაში იბრძოდა დამოუკიდებლობისთვის. დამოუკიდებელი ქვეყნის არსებობის შემთხვევაში არსებობს სრულფასოვანი ერი და ეს არის ჩვენი ერის იდენტობის უმნიშვნელოვანესი განმსაზღვრელი ნაწილი, სხვა შემთხვევაში ჩვენ ვიქნებოდით ეთნიკური ჯგუფი და ჩვენ ბედნიერი ვართ, რომ გვაქვს დამოუკიდებელი ქვეყანა, რომელზეც რა თქმა უნდა ძალიან დიდი პასუხისმგებლობა აქვს თითოეულ ჩვენგანს, რომ ამ ქვეყნის დამოუკიდებლობა, მშვიდობაა და წინსვლა შევინარჩუნოთ. ეს მიიღწევა მხოლოდ ერთობით და ვფიქრობ, არის დღეები, როდესაც თითოეული ქვეყნის თითოეული მოქალაქე ამ მნიშვნელოვანი დღის, მნიშვნელოვანი სიმბოლოს გარშემო უნდა ერთიანდებოდეს, იმისთვის რომ ჩვენ შევინარჩუნოთ ეს მონაპოვარი. ამ მონაპოვარს გაფრთხილება და შენარჩუნება კიდევ უფრო მნიშვნელოვანია. დამოუკიდებლობის მოპოვება რა თქმა უნდა რთული იყო, მაგრამ შენარჩუნება არანაკლებ რთული აღმოჩნდა. ჩვენ ეს დავინახეთ მრავალი წლის განმავლობაში იმ გამოწვევების ფონზე, რომელიც ქვეყანას გააჩნია.
დამოუკიდებლობა ფორმალურად რაღაც ქაღალდზე ქვეყნის დამოუკიდებლობას არ ნიშნავს, ეს არის ქვეყნის სუვერენიტეტი სხვადასხვა მიმართულებით, იმისთვის რომ ჩვენი ღირებულებები, რომლებიც დამოუკიდებლობაშია წარმოდგენილი შევინარჩუნოთ. ეს არის ქართველებისთვის მნიშვნელოვანი კულტურული ღირებულება, ჩვენი მემკვიდრეობა, ჩვენი ფასეულობები და ასე შემდეგ. ამ ყველაფერს ზრუნვა, გაფრთხილება სჭირდება. ვფიქრობ, რომ ბოლო წლებში ქართველებმა შევინარჩუნეთ ჩვენი სუვერენიტეტი, ჩვენ გვაქვს ქვეყანა რომელსაც დღეს აღიარებენ, ქვეყანა რომელსაც გარკვეული ცნობადობა გააჩნია და რა თქმა უნდა ქვეყნის ცხოვრების სხვადასხვა მიმართულებაში წარმატების ფონზე ეს აღიარება, ეს ცნობადობა კიდევ უფრო გაიზრდება“, – განაცხადა დავითაშვილმა.