მიმაჩნია, რომ პროკურორი მიკერძოებულია, მაგრამ შემდეგიც ასეთი იქნება და რა აზრი აქვს აცილებას?, – ამის შესახებ პრეზიდენტის სიძის მეგობარმა, მიხეილ თათარიშვილმა დღევანდელ სასამართლო პროცესზე განაცხადა.
მოსამართლის კითხვაზე, ხომ არ აქვს პროკურორის აცილების შუამდგომლობა, განსაკუთრებით დიდი ოდენობით ნარკოტიკული საშუალების უკანონოდ შეძენა- შენახვაში ბრალდებულმა აღნიშნა, რომ მომდევნო პროკურორიც ისეთივე მიკერძოებული იქნება, როგორც არსებული.
როგორც თათარიშვილის ადვოკატმა ირმა ჭკადუამ მოგვიანებით განმარტა, ბრალდებულს და დაცვის მხარეს პროკურორის აცილების შუამდგომლობა ამ ეტაპზე არ აქვთ, რადგან სასამართლო განხილვები ახლა იწყება.
ამასთან, როგორც თათარიშვილმა აღნიშნა, ის წარდგენილ ბრალში თავს დამნაშავედ არ ცნობს.
არსებითი განხილვის პირველ სასამართლო პროცესს პრეზიდენტ გიორგი მარგველაშვილის შვილი ანა მარგველაშვილიც ესწრება, თუმცა მას დარბაზი დაატოვებინეს, ვინაიდან აღნიშნულ საქმეზე მოწმის სტატუსით უნდა დაიკითხოს.