პატრიოტების ეპოქა – საქართველოს პრემიერის პოლიტიკური გზავნილები ბუდაპეშტიდან (ვიდეო)

უნგრეთის პრემიერ-მინისტრმა ზუსტად იცის, რა ხდება საქართველოში და რა წნეხს უძლებს ქვეყნის უდიდესი უმრავლესობის მიერ არჩეული „ქართული ოცნების“ ხელისუფლება, პრემიერ-მინისტრ ირაკლი კობახიძის ხელმძღვანელობით.

ვიქტორ ორბანი ამბობს, რომ ირაკლი კობახიძე, ყველა გამოწვევის მიუხედავად, ახერხებს ქვეყანაში ეროვნული იდენტობისა და კულტურის შენარჩუნებას. უნგრეთის პრემიერი ქართველ კოლეგას პოლიტიკაში „დიდ მოჭადრაკედ“ მიიჩნევს. საქართველოს მთავრობის მეთაურის ეს შეფასება ორბანმა მსოფლიო პოლიტიკურ ლიდერებთან შეხვედრის დროს გააკეთა, კერძოდ, კონსერვატიული პოლიტიკური მოქმედების კონფერენციაზე.

წელს კონფერენციის სახელწოდება „პატრიოტების ეპოქა“ იყო. იდენტობა, ღირებულებები, ოჯახი, კულტურა და ეკლესიისადმი პატივისცემა – ყოველწლიური კონფერენცია წელსაც უმთავრეს ფასეულობებზე საუბარს დაეთმო. შეკრებილ ლიდერებს აშშ-ის პრეზიდენტმა, დონალდ ტრამპმა მიმართა.

კონფერენციაზე ირაკლი კობახიძემ მსოფლიოს გაუგზავნა საქართველოს გზავნილები, რომ საქართველოს ერთგულება ევროპული ინტეგრაციის მიმართ მტკიცეა, მაგრამ ქვეყანა არ დათმობს ღირსებასა და სუვერენიტეტს, მიუღებელია ორმაგი სტანდარტები და რომ საქართველო არც იდენტობას გაცვლის პოლიტიკურ კეთილგანწყობაზე.

დეტალები ნახეთ ვარლამ წიკლაურის სპეციალურ რეპორტაჟში ბუდაპეშტიდან.