„ხალხის ძალის“ აღმასრულებელი მდივანი გურამ მაჭარაშვილი ნიკა გვარამიას დაკავების ფაქტზე ლიეტუვის საგარეო საქმეთა სამინისტროს მიერ გაკეთებულ განცხადებას ეხმიანება.
„ეს არა მარტო ჩარევაა, ეს არის პირდაპირი შეურაცხყოფა. რა თქმა უნდა, ჩვენთვის, სამწუხაროდ, დიდი მნიშვნელობა აღარ აქვს, რას იტყვიან ბალტიის პირა ქვეყნების ელჩები, რომლებიც უხეშად ერევიან პოლიტიკაში. თუმცა, ამავდროულად ყველას გავაფრთხილებთ, რა თქმა უნდა, რომ ქართველი ადამიანი არავის არაფერს აპატიებს, თუკი წავა საქართველოს ინტერესების წინააღმდეგ“, – განაცხადა გურამ მაჭარაშვილმა.
მმართველი გუნდი ლიეტუვის საგარეო საქმეთა სამინისტროს მხრიდან ნიკა გვარამიას მხარდამჭერ განცხადებას ეხმაურება. „ქართული ოცნება“ მოუწოდებს უცხოელ აქტორებს, თავდაპირველად გაეცნონ შესაბამის კანონს და საქმის მსვლელობას. მმართველი გუნდის განცხადებით, საქართველო არის სამართლებრივი სახელმწიფო და კანონ დამრღვევი კანონის წინაშე აგებს პასუხს.