თურქეთის პრეზიდენტი რეჯეფ თაიფ ერდოღანი ამერიკელ კოლეგას, დონალდ ტრამპს ტელეფონით ესაუბრა. ამის შესახებ სააგენტო „ანადოლუ“ წერს.
თურქული მედიის ცნობით, საუბარი ისრაელსა და ირანს შორის მიმდინარე დაპირისპირებას, რეგიონულ და გლობალურ საკითხებს ეხებოდა. ერდოღანმა კმაყოფილება გამოთქვა დონალდ ტრამპის განცხადებასთან დაკავშირებით, რომელიც ისრაელსა და ირანს შორის შეტაკებების შეწყვეტისკენ მოუწოდებდა.
„პრეზიდენტმა ერდოღანმა აღნიშნა, რომ დიპლომატია არის ბირთვული დაპირისპირების მოგვარების ერთადერთი გზა და განაცხადა, რომ თურქეთი მზადაა ნებისმიერი ძალისხმევისთვის, მათ შორის, მედიატორის როლის შესრულებით“, – ნათქვამია თურქული მედიის მიერ გავრცელებულ ინფორმაციაში.
მათივე ცნობით, თურქეთის პრეზიდენტმა ასევე ხაზი გაუსვა, რომ ისრაელის ირანზე თავდასხმამ გამოიწვია ორივე მხარისთვის შეუქცევადი ეკონომიკური და სამოქალაქო ზიანი და ხაზი გაუსვა, რომ ეს უნდა შეჩერდეს.