გელათის სამონასტრო კომპლექსის მთავარი ტაძრის ერთიანი დროებითი გადახურვის სამუშაოები დასრულდა. აღნიშნულის შესახებ ინფორმაციას საქართველოს კულტურის სამინისტრო ავრცელებს.
მათივე ცნობით, ერთიანი-დროებითი გადახურვის სამუშაოები მსოფლიო მემკვიდრეობის ცენტრის – UNESCO-ს რეკომენდაციის მიხედვით გელათის რეაბილიტაციის დროებითი კომიტეტმა განახორციელა.
„რეაბილიტაციის მთლიან პროცესს, მათ შორის ერთიანი-დროებითი გადახურვის კონსტრუქციის განხორციელებას, საქართველოს მთავრობა და კულტურის სამინისტრო მტკიცედ და აქტიურად უჭერს მხარს.
გელათის მთავარი ტაძრის გუმბათის გადახურვის პროცესს საქართველოს კულტურის მინისტრი თინათინ რუხახე, მოადგილეებთან ბექა დავითულიანთან, გიორგი მირცხულავასთან და გელათის რეაბილიტაციის დროებითი კომიტეტის თავმჯდომარის მოადგილე არქიმანდრიტ კირიონთან (ონიანი) ერთად დაესწრო. ასევე, მინისტრი ადგილზე გაეცნო მიმდინარე სამუშაოებს და დისკუსია ჰქონდა გელათის მთავარი ტაძრის მხატვრობის კონსერვაციის ჯგუფთან. აღინიშნა, რომ სახელმწიფოს, ეკლესიისა და სამეცნიერო წრეების ერთობლივმა ძალისხმევამ შედეგი გამოიღო.
UNESCO-ს მსოფლიო მემკვიდრეობის დაცვის პრინციპები გათვალისწინებულია და ძეგლის საკონსერვაციო მდგომარეობის გაუმჯობესების პროცესი შეუქცევადია. თინათინ რუხაძემ ჩატარებული სამუშაოებისთვის მადლობა გადაუხადა გელათის რეაბილიტაციის დროებით კომიტეტს და ძეგლზე მომუშავე კედლის მხატვრობის კონსერვაციის ქართველ სპეციალისტებს“, – ნათქვამია საქართველოს კულტურის სამინისტროს ინფორმაციაში.