პირველ რიგში ვიტყვი, რომ ძირითადი ღონისძიებები უკვე დაანონსებული გვაქვს. პირველი დიდი ღონისძიება, რომელიც დაგეგმილია და ყველამ კარგად იცის, ეს არის 23 ივლისი, Justin Timberlake, – განაცხადა გადაცემა „დღის ქრონიკაში“ Starring Georgia-ს მენეჯერმა ციცი იაშვილმა.
მისივე თქმით, მანამდე რამდენიმე მნიშვნელოვანი ღონისძიება იქნება Starring Georgia-ს შემთხვევაში.
„15 ივლისს ჩვენთვის საყვარელი და საამაყო პროექტი, სოციალური სივრცე გვაქვს გასახსნელი. წელს კიდევ რამდენიმე საინტერესო პროექტი გვაქვს დასაანონსებელი და თვითონ უკვე სივრცეში რამდენიმე ქართული ღონისძიება გვაქვს დასაანონსებელი.
რაც შეეხება ტურიზმის მიმართულებით მნიშვნელოვან ციფრებს და მნიშვნელოვან წინსვლებს Starring Georgia-ს შესახებ, ამაზე უკვე ციფრები მეტყველებს და გაყიდული ბილეთების სტატისტიკა იმიტომ, რომ პირველ წელს თუ ვამაყობდით იმით, რომ 30 ათასი ბილეთი გავყიდეთ 7 საათში Imagine Dragons-ის შემთხვევაში, დაახლოებით ორი თვის წინ ჩვენივე რეკორდი ჩვენითვე გავაუმჯობესეთ და 5 საათში 50 ათასზე მეტი ბილეთი გავყიდეთ Justin Timberlake-ის შემთხვევაში. ანალოგიური ზრდა არის საზღვარგარეთიდან. ანუ, უცხოური მისამართით ნაყიდი ბილეთები. შესაბამისად, ციფრები მეტყველებს პროექტის მნიშვნელობაზეც, პროექტის ზრდაზეც და იმაზეც, რომ საქართველოში ნამდვილად გვინდა, ნამდვილად გვეკუთვნის და ნამდვილად არის მოთხოვნადი მსგავსი ტიპის ღონისძიებები, რომელსაც ჰქვია საერთაშორისო სტანდარტით ღონისძიებების ორგანიზება“, – აღნიშნა ციცი იაშვილმა.