გერმანიაში აცხადებენ, რომ ჩინეთმა გერმანული თვითმფრინავის წინააღმდეგ ლაზერი გამოიყენა.
ამის შესახებ ნათქვამია გერმანიის საგარეო საქმეთა სამინისტროს მიერ სოციალურ ქსელ „იქსში“ გამოქვეყნებულ განცხადებაში.
როგორც ბერლინში აცხადებენ, საუბარია გერმანულ თვითმფრინავზე, რომელიც წითელ ზღვაში „ჰუსიტების“ საწინააღმდეგო ევროკავშირის მისიაში მონაწილეობს.
როგორც გერმანიის საგარეო უწყებაში აღნიშნავენ, მომხდარის გამო ჩინეთის ელჩი სასაუბროდ გამოიძახეს.
„გერმანული პერსონალისთვის საფრთხის შექმნა და ევროკავშირის მისიის ფარგლებში ოპერაციებისთვის დაბრკოლების შექმნა მიუღებელია“, – განაცხადეს გერმანიის საგარეო საქმეთა სამინისტროში.
ბერლინში არ დაუკონკრეტებიათ, ჩინეთის რომელი ძალები იმყოფებოდნენ წითელ ზღვაში.
ცნობისთვის, ევროკავშირის მისია წითელი ზღვის აკვატორიაში უსაფრთხოების უზრუნველსაყოფად და თავისუფალი ნაოსნობის დაცვის მიზნით იმყოფება.