აშშ-ს Patriot-ის საჰაერო თავდაცვის სისტემების რაკეტების მხოლოდ დაახლოებით 25% დარჩა, რომლებიც პენტაგონის სამხედრო გეგმების განსახორციელებლად არის საჭირო. მარაგის ნაწილი ახლო აღმოსავლეთში დაიხარჯა. ინფორმაციას ამის შესახებ ბრიტანული გამოცემა The Guardian-ი წყაროებზე დაყრდნობით ავრცელებს.
წყაროების ცნობით, სწორედ Patriot-ის რაკეტების დეფიციტმა შესაძლოა გამოიწვია აშშ-ის სამხედრო დახმარების შეჩერება უკრაინისთვის.
მათი თქმით, ამჟამად ვაშინგტონს აქვს საბრძოლო მასალის რაოდენობა, რომელიც ოპერატიული გეგმების შესასრულებლად საჭირო მინიმალურ მაჩვენებელზე დაბალია.
სტატიაში ხაზგასმულია, რომ კრიტიკულად მნიშვნელოვანი საბრძოლო მასალის მარაგი უკვე რამდენიმე წელია მინიმალურ დასაშვებ დონეზე დაბალია.
წყაროებმა ჟურნალისტებს განუცხადეს, რომ რაოდენობამ მკვეთრად შემცირება დაიწყო მას შემდეგ, რაც ჯო ბაიდენის ადმინისტრაციამ უკრაინისთვის სამხედრო დახმარების გაგზავნა დაიწყო.
გამოცემის თანამოსაუბრეებმა აღნიშნეს, რომ ტრამპის ადმინისტრაციამ Patriot-ის რაკეტებისა და სხვა საბრძოლო მასალის მარაგების დონის გადახედვა დაახლოებით თებერვალში დაიწყო. სიტუაცია გაუარესდა მას შემდეგ, რაც ვაშინგტონმა ახლო აღმოსავლეთში მეტი კომპლექსის განლაგება გადაწყვიტა.