საფრანგეთში, ტყეში გაჩენილი ხანძრების შედეგად დაშავებულთა რიცხვმა 100-ს გადააჭარბა. როგორც „ბიბისი“ იუწყება, ხანძრების შედეგად მსუბუქი დაზიანებები 110-მა ადამიანმა მიიღო.
ცეცხლმა საფრანგეთის სიდიდით მეორე ქალაქის, მარსელის შემოგარენს მიაღწია.
საფრანგეთის შინაგან საქმეთა მინისტრის თქმით, მობილიზებულია 800-ზე მეტი მეხანძრე. ხანძართან ბრძოლა მთელი ღამე გრძელდებოდა, ცეცხლი ჯერ ლოკალიზებული არ არის.
მარსელის მერის განცხადებით, მეხანძრეთა ბრიგადები ებრძვიან ხანძარს, რომელიც საცხოვრებელ სახლებთან ძალიან ახლოს მძვინვარებს.
ფრანგული მედიის ცნობით, საფრთხის გამო საკუთარი სახლებიდან 400 ადამიანის ევაკუაცია გახდა საჭირო. დაშავებულთა შორის ცხრა მეხანძრეა.
მოქალაქეები გააფრთხილეს, დარჩნენ სახლებში და არ დატოვონ ტერიტორია, თუ მათ ევაკუაციის განკარგულებას არ მისცემენ.
სტიქიას გამოეხმაურა საფრანგეთის პრეზიდენტი ემანუელ მაკრონი, რომელიც სახელმწიფო ვიზიტით ბრიტანეთში იმყოფება. მან მოქალაქეებს მოუწოდა, დაემორჩილონ საგანგებო სამსახურების მითითებებს.
„ჩემი ფიქრებით დაშავებულებსა და ყველა მოქალაქესთან ვარ“, – დაწერა მაკრონმა სოციალურ ქსელ „იქსში“.
მარსელთან ხანძრის გამო დროებით დახურული იყო ქალაქის აეროპორტი. გავრცელებული ცნობით, აეროპორტი დღეს განაახლებს მუშაობას.
ხანძარმა, რომელიც მარსელის ჩრდილოეთით 8 ივლისს გაჩნდა, 700 ჰექტარის ფართობის ტერიტორია მოიცვა.