აშშ-ის პრეზიდენტთან, დონალდ ტრამპთან შეხვედრა ღაზაში მყოფი მძევლების გათავისუფლების მცდელობებზე იყო ფოკუსირებული, – ამის შესახებ ისრაელის პრემიერ-მინისტრმა, ბენიამინ ნეთანიაჰუმ განაცხადა.
ნეთანიაჰუმ თეთრ სახლში დონალდ ტრამპსა და ვიცე-პრეზიდენტ ჯეი დი ვენსთან მეორე შეხვედრა გამართა, რომელიც დაახლოებით ერთ საათს გრძელდებოდა.
ნეთანიაჰუმ აღნიშნა, რომ ისრაელს მტკიცედ აქვს გადაწყვეტილი, ღაზაში ყველა მიზანს მიაღწიოს.
„უნდა მივაღწიოთ ჩვენი ყველა მძევლის, როგორც ცოცხალის, ასევე გარდაცვლილის გათავისუფლებას; „ჰამასის“ სამხედრო და მმართველობითი შესაძლებლობების ლიკვიდაციას და იმის უზრუნველყოფას, რომ ღაზა აღარ წარმოადგენდეს საფრთხეს ისრაელისთვის“, – განაცხადა ნეთანიაჰუმ.
ისრაელის პრემიერ-მინისტრის თქმით, სამმა ლიდერმა ასევე განიხილა „შედეგები და შესაძლებლობები“ იმ ოპერაციისა, რომელიც ისრაელმა და აშშ-მა ერთობლივად ჩაატარეს ირანის წინააღმდეგ.