რუსეთმა მორიგი მასშტაბური შეტევა მიიტანა უკრაინის ტერიტორიაზე.
როგორც უკრაინული მედია ხელისუფლებაზე დაყრდნობით იუწყება, რუსეთმა უკრაინის მიმართულებით რაკეტები და დრონები გაუშვა.
მათივე ცნობით, ომის დაწყებიდან ყველაზე მძლავრი შეტევა განხორციელდა ვოლინის ოლქის ქალაქ ლუცკზე. ამ ეტაპზე დაღუპულების შესახებ ინფორმაცია არ ვრცელდება.
ადგილობრივი ხელისუფლება იუწყება, რომ იერიშის შედეგად რამდენიმე შენობა დაზიანდა და გაჩნდა ხანძარი. სხვა დეტალები ჯერ უცნობი რჩება.
ადგილობრივი ხელისუფლება იუწყება, რომ ქალაქში ძლიერი აფეთქებების ხმა ისმოდა.
უკრაინის საჰაერო თავდაცვის ძალების ცნობით, რუსეთის შეტევის დროს გამოყენებული იყო „კინჟალის“ ტიპის რაკეტები და საბრძოლო დრონები. იერიშის დროს აფეთქებები ისმოდა კიევის შემოგარენშიც. საჰაერო განგაში გამოცხადებული იყო ხარკოვის, დონეცკის, პოლტავისა და ჩერნიჰივის ოლქებში. სარაკეტო შეტევა განხორციელდა ზაპოროჟიეს ოლქზეც.
თავის მხრივ, რუსეთის თავდაცვის უწყება ავრცელებს ცნობას უკრაინული დრონების შეტევის შესახებ. მათი ინფორმაციით, რუსეთის რეგიონებში ღამით 86 უპილოტო საფრენი აპარატი ჩამოაგდეს. დრონების შეტევა იყო ბრიანსკისა და ბელგოროდის, ასევე კურსკის, ტულის, ორლოვის, მოსკოვის, სმოლენსკის, ვორონეჟისა და რიაზანის ოლქებში. ამასთან, რა ზიანი მოჰყვა უკრაინული დრონების თავდასხმას, ამის შესახებ რუსეთის თავდაცვის სამინისტრო არაფერს ამბობს.