ევროპელი ლიდერები დონალდ ტრამპს დაანონსებული ტარიფების გამო აკრიტიკებენ და აცხადებენ, რომ ევროკავშირისთვის 30%-იანი ტარიფების დაწესება ბიზნესებს დააზიანებს, გაზრდის ინფლაციას, შექმნის გაურკვევლობას და ხელს შეუშლის ეკონომიკურ ზრდას.
ევროპა შეერთებულ შტატებს საკუთარი ინტერესების დასაცავად საპასუხო ზომებით ემუქრება. შესაბამისი პოსტები ლიდერებმა სოციალურ ქსელში გამოაქვეყნეს.
„30%-იანი ტარიფი ევროკავშირის ექსპორტზე დააზიანებს ბიზნესებს, მომხმარებლებსა და პაციენტებს ატლანტის ოკეანეს ორივე მხარეს. პირველ აგვისტომდე შეთანხმების მიღწევისთვის მუშაობას გავაგრძელებთ. ამავდროულად, მზად ვართ დავიცვათ ევროკავშირის ინტერესები პროპორციული კონტრზომების გამოყენებით“, – დაწერა ევროკომისიის პრეზიდენტმა ურსულა ფონ დერ ლაიენმა.
თემაზე კომენტარი ევროპული საბჭოს პრეზიდენტმა ანტონიო კოშტამაც გააკეთა.
„თავისუფალი და სამართლიანი ვაჭრობა ზრდის კეთილდღეობას, სამუშაო ადგილებს, ქმნის და აძლიერებს ლოგისტიკურ ჯაჭვებს. ტარიფები გადასახადებია. ისინი ზრდიან ინფლაციას, ქმნიან გაურკვევლობას და ხელს უშლიან ეკონომიკურ ზრდას, – დაწერა მან.
საფრანგეთის პრეზიდენტმა ემანუელ მაკრონმა კი ევროკავშირს ევროპელების ინტერესების დაცვისკენ მოუწოდა.
„კომისიამ როგორც არასდროს, უნდა დაადასტუროს, რომ მტკიცედ დაიცავს ევროპულ ინტერესებს. ეს გულისხმობს სანდო კონტრზომების მომზადების დაჩქარებას, მის ხელთ არსებული ყველა ინსტრუმენტის მობილიზებით“, – დაწერა მან.