ისრაელის საჰაერო დარტყმის შედეგად ღაზის სექტორში დაიღუპა ათი ადამიანი, მათ შორის ექვსი ბავშვი, რომლებიც წყლის ჭურჭლის შესავსებად რიგში იმყოფებოდნენ. დაბომბვის შედეგად კიდევ 16-მა ადამიანმა სხეულის დაზიანება მიიღო, მათ შორის შვიდი ბავშვია.
თვითმხილველთა თქმით, უპილოტო აპარატმა რაკეტა ესროლა ალ-ნუსეირათის ლტოლვილთა ბანაკში, წყლის ავზის გვერდით ცარიელი ქილებით რიგში მდგომ ადამიანებს.
ისრაელის სამხედროებმა განაცხადეს, რომ „ისლამური ჯიჰადის“ „ტერორისტის“ წინააღმდეგ დაგეგმილი ოპერაციის დროს „ტექნიკური შეცდომა“ იყო დაშვებული, რის შედეგადაც საბრძოლო მასალა სამიზნედან ათობით მეტრის დაშორებით ჩამოვარდა. სამხედროების თქმით, ინციდენტი განხილვის პროცესშია. ღაზის სექტორის სამოქალაქო თავდაცვის სააგენტოს ცნობით, ისრაელის საჰაერო თავდასხმების შედეგად 13 ივლისს, სულ მცირე, 85 პალესტინელი დაიღუპა.