საქართველოს ტურიზმის ეროვნული ადმინისტრაცია ინდოეთიდან ჩამოსულ გადამღებ ჯგუფს მასპინძლობს. ინფლუენსერები და ვიდეოგრაფები, რომლებიც წამყვან საერთაშორისო მედია და ტურისტულ პლატფორმებთან თანამშრომლობენ, ამზადებენ ვიდეორგოლებს საქართველოს პოპულარიზაციის მიზნით.
ტურიზმის ეროვნული ადმინისტრაციის ინფორმაციით, ვიდეომასალა გავრცელდება ისეთ პოპულარულ პლატფორმებზე, როგორებიცაა: Instagram, YouTube, Thomas Cook, Tripoto, Thrillophilia და სხვა.
ინდურ ჯგუფს შეხვდა ტურიზმის ეროვნული ადმინისტრაციის ხელმძღვანელი მაია ომიაძე, რომელმაც აღნიშნა:
„ინდოეთში ტურიზმის ეროვნული ადმინისტრაცია ახორციელებს მასშტაბურ მარკეტინგულ კამპანიას. წლის დასაწყისიდან რამდენიმე ინდურ ქალაქში ჩატარდა ღონისძიებები. მიმდინარეობს კამპანიები როგორც ციფრულ, ასევე ტრადიციულ მედიაში. ახლა ვმასპინძლობთ გადამღებ ჯგუფს, რომელიც ამზადებს ვიდეორგოლებსა და ფოტომასალას, რათა საქართველო, როგორც ტურისტული მიმართულება, პოპულარული გახდეს ინდოეთში.“
ტურის ფარგლებში 7-კაციანი გადამღები ჯგუფი მოინახულებს შემდეგ ლოკაციებს:
თბილისი – ნარიყალა, მთაწმინდა
კახეთი – ნაფარეული, ყვარლის მარნები, ქვევრის მუზეუმი
მცხეთა-მთიანეთი – გერგეტის სამება, სტეფანწმინდა, გუდაური
ქვემო ქართლი – დაშბაშის კანიონი
იმერეთი – ქუთაისი, წყალტუბო, პრომეთეს მღვიმე
სამეგრელო – მარტვილის კანიონი
სვანეთი – უშგული, მესტია
აჭარა – ბათუმი, ბოტანიკური ბაღი
ტურის მონაწილე, აბჯიტ სინგი:
„დიდი მადლობა საქართველოს ტურიზმის ეროვნულ ადმინისტრაციას. არ ვიცოდი, რომ ასეთი ლამაზი ქვეყანა გქონდათ. ვაპირებ, მეგობრებთან ერთად დავბრუნდე და მშობლებიც ჩამოვიყვანო. აღფრთოვანებული ვარ ქართული სამზარეულოთი და სტუმართმოყვარეობით. ინდოეთში ვამბობთ – Atithi Devo Bhava (სტუმარი ღვთაებაა), თქვენ კი – სტუმარი ღმერთისაა. ეს კულტურული მსგავსება ერთგვარად გვაერთიანებს.“
ვიდეორგოლებში წარმოდგენილი იქნება: ქართული კულტურა, ბუნება, სათავგადასავლო ტურისტული პროდუქტები, ქართული სამზარეულო და ღვინო.