დღეს ქართულ სცენას კიდევ ერთი მსოფლიო ვარსკვლავი დაიკავებს – პროექტ „სტარინგ ჯორჯიის“ ფარგლებში ბორის პაიჭაძის სახელობის „დინამო არენაზე“ ჯასტინ ტიმბერლეიკის კონცერტი გაიმართება. პოპ-მუსიკის ერთ-ერთი ყველაზე პოპულარული შემსრულებელი, რომელიც უკვე 30 წელზე მეტია სცენაზეა და მსოფლიოში 54 მილიონზე მეტი ალბომი აქვს გაყიდული, პირველად წარდგება ქართული პუბლიკის წინაშე.
კონცერტის გამო „დინამო არენის“ მიმდებარე ტერიტორიაზე მოძრაობა შეიზღუდება, მგზავრთა კომფორტისთვის კი მეტრო და ავტობუსები 24 ივლისის 02:00 საათამდე იმუშავებენ.
კონცერტზე უსაფრთხოების წესები მკაცრად იქნება დაცული – არ იქნება შემნახველი საკნები, ამიტომ მაყურებლებმა მხოლოდ აუცილებელი ნივთები უნდა წაიღონ. აკრძალულია საკვები, სასმელი, ლითონის ნივთები, პროფესიონალური კამერები და პიროტექნიკა; დაშვებულია მცირე ზომის კამერა, პატარა ჩანთა და სუნამო (50 მლ-მდე). კონცერტზე არ დაიშვებიან შინაური ცხოველები.