პარლამენტის თავდაცვისა და უსაფრთხოების კომიტეტის თავმჯდომარის პირველი მოადგილის, თენგიზ შარმანაშვილის განცხადებით, ვიზალიბერალიზაციის გაუქმების საკითხთან დემოკრატიის დონე არაფერ შუაშია და ამას ქართველი ხალხის სადამსჯელო მექანიზმად იყენებენ.
მისი განმარტებით, ქართველი ერი ამას აღიქვამს, როგორც სადამსჯელო ღონისძიებას მის წინააღმდეგ და პასუხსაც შესაბამისს გასცემს ბოლო არჩევნებზე.
“60-ზე მეტ ქვეყანას აქვს ვიზალიბერალიზაცია ევროპის კავშირთან. ახლა რომ დავუყვეთ ამ 60 ქვეყანას, აღმოვაჩენთ, რომ დემოკრატიაში წელგამართულები საქართველოს დონეზე არ არიან. ეს ყველაფერი არ არის დაკავშირებული ვიზალიბერალიზაციასთან, თუ ზოგადად დემოკრატიულ ფონს გულისხმობთ. რატომ შემოიტანეს ეს? შემოიტანეს იმიტომ, რომ ეს გამოიყენონ როგორც სადამსჯელო ღონისძიება. ქართველი ერი ამას აღიქვამს, როგორც სადამსჯელო ღონისძიებას მის წინააღმდეგ და პასუხსაც შესაბამის გასცემს ბოლო არჩევნებზე. ომის საფრთხეები არ წასულა, რადგან ფაქტი ერთია – ასე სწრაფად ეს კონფლიქტი, რომელიც შუაგულ ევროპაშია გაჩაღებული არ დასრულდება. მათთვის მთავარია ცეცხლის რკალში ჰყავდეთ რუსეთი და ამაში მონაწილეობა მიგვაღებინონ ჩვენც“, – განაცხადა შარმანაშვილმა.