„ფარას“ მსგავსი კანონმდებლობა საქართველოში არ არის გასაუქმებელი, ეს ჩვენი უსაფრთხოების ფუნდამენტია, – ამის შესახებ საპარლამენტო უმრავლესობის წევრმა, თენგიზ შარმანაშვილმა განაცხადა.
როგორც შარმანაშვილმა აღნიშნა, ცნობილი უნდა იყოს, უცხოეთიდან ვინ იღებს ფულს და რაში ხარჯავს, რადგან ეს ქვეყნის უსაფრთხოების გარანტიაა.
„უნდოდათ, ჯო უილსონი ისე წარმოეჩინათ, რომ საქართველოს დემოკრატიაზე გადამკვდარი მებრძოლია. ასე რომ არ არის, ეს ყველა ნაბიჯზე ჩანს. „ფარაში“ ეს პირველად არ გამოჩნდა. ადრეც იყო თანხები გამოქვეყნებული. შედარებით ნაკლები, ვიდრე ახლაა, მაგრამ იყო. ბოლო ინფორმაცია მის დასახასიათებლად არ მჭირდებოდა, მაგრამ ქართველი ხალხისთვის იყო საჭირო. ამით დასტურდება, რომ „ფარას“ მსგავსი კანონმდებლობა საქართველოში არ არის გასაუქმებელი. ეს ჩვენი უსაფრთხოების ფუნდამენტია. უცხოეთიდან ვინ იღებს ფულს, რაში იღებს და რაში ხარჯავს, უნდა ვიცოდეთ, რადგან ქვეყნის უსაფრთხოების გარანტიაა. ამიტომ ამ კანონს არ გავაუქმებთ და ამ თემაზე არც კი დავფიქრდებით“, – განაცხადა თენგიზ შარმანაშვილმა.