ძალიან მძიმე იყო, როდესაც პრემიერ-მინისტრის კაბინეტში ერთ-ერთი ქვეყნის ელჩი პირდაპირ იმუქრებოდა, აშანტაჟებდა პრემიერ-მინისტრს, პარტიის თავმჯდომარეს, რომ ქვეყანაში უნდა გახსნილიყო მეორე ფრონტი და დაგვეწყო საბრძოლო მოქმედებები, – განაცხადა გადაცემაში „იმედი LIVE“ თბილისის მერმა, „ქართული ოცნების“ გენერალურმა მდივანმა კახა კალაძემ.
მისი თქმით, სამხედრო ტექნიკით მომარაგება მოხდებოდა.
„როდესაც კითხვა დაისვა, რომ კარგი, ჩვენ შეგვიძლია, გვყავს მაგარი ბიჭები, მაგარი ჯარი, თუმცა დღეს ტექნოლოგიურად ყველაფერი ისეა განვითარებული, ისე მიდის ყველაფერი, ვხედავთ თუ როგორ მიდის საბრძოლო მოქმედებები, ძირითადად ტექნიკის მეშვეობით, ვთქვათ, გავძელით ერთი კვირა, ათი დღე, მერე რას ვშვრებით? პასუხი იყო ნამდვილად გასაოცარი. პასუხი რაც მივიღეთ, ეს იყო, რომ უნდა გადავსულიყავით პარტიზანულ ბრძოლებზე. ამას, რა თქმა უნდა, შემდეგ მოჰყვა პირდაპირ განცხადებები უკრაინის მაღალი თანამდებობის პირების მხრიდან, რომ საქართველო უნდა შეეხიდოს უკრაინას, უნდა გაიხსნას მეორე ფრონტი. აგრეთვე პირდაპირი მოწოდებები იმასთან დაკავშირებით, რომ ადგილობრივი არასამთავრობო ორგანიზაციები იყვნენ ჩართული, ოპოზიციური პარტიები, რომ გვირჩევია ბომბები ცვიოდეს ქვეყანაში, ვიდრე მაგალითად „ქართული ოცნებისგან“ ვისმენდეთ ისეთ განცხადებებს, რომ არც მეორე ფრონტი გაიხსნება ქვეყანაში და ვერც სანქციებს შევუერთდებით იმიტომ, რომ ეს ყველაფერი დამანგრეველი და დამაზიანებელი იქნებოდა ქვეყნისთვის.
რა თქმა უნდა, ეს პროცესი მთელი ამ ხნის განმავლობაში მუდმივად მიმდინარეობს, შანტაჟი, ქვეყნის წინააღმდეგ, ქართველი ხალხის წინააღმდეგ ევროინტეგრაციის პროცესით. ხან კანდიდატის სტატუსის თემა შემოიტანეს. გვახსოვს მაშინ ყველა პარამეტრით, განხორციელებული პროექტებით, რეფორმებით საქართველო გაცილებით წინ იყო იმ ქვეყნებთან შედარებით, ვისაც მაშინ მისცეს კანდიდატის სტატუსი და უსამართლო გადაწყვეტილება, სუფთა პოლიტიკური გადაწყვეტილება. დასჯა მოინდომეს ჩვენი ქვეყნის, საქართველოს დაუგვიანეს კანდიდატის სტატუსის მიცემა. გვახსოვს მესიჯი რა იყო ძირითადი, რომ ქართველ ხალხს პირდაპირ ეუბნებოდნენ, აი თქვენ კარგი ხალხი ხართ, რა თქმა უნდა, იმსახურებთ ევროპას, ევროპულ მომავალს, მაგრამ ხელისუფლება გყავთ ცუდი. ანუ, იყენებდნენ როგორც იარაღად ევროინტეგრაციის პროცესს საქართველოს ხელისუფლების წინააღმდეგ. უნდოდათ, რომ ქართველი ხალხი დაეპირისპირებინათ ხელისუფლებასთან. მესიჯი ჰქონდათ ძალიან მარტივი, თქვენ კარგი ხალხი ხართ, მაგრამ ხელისუფლება გყავთ ცუდი. თუმცა, ხალხმა ეს ყველაფერი გაანალიზა“, – აღნიშნა კახა კალაძემ.