არსებითი მნიშვნელობა ამას არ აქვს, რამდენი პოლიტიკური პარტია ან პოლიტიკოსი მიიღებს არჩევნებში მონაწილეობას, – განაცახდა „ქართული ოცნების“ გენერალურმა მდივანმა, დედაქალაქის მერმა კახა კალაძემ გადაცემაში „იმედი LIVE“ ადგილობრივი თვითმმართველობის ორგანოების არჩევნებში მონაწილეობის თემაზე ოპოზიციაში არსებულ დაპირისპირებაზე საუბრისას.
კალაძემ აღნიშნა, რომ ოპოზიციამ პოზიცია, რომ არ მიიღებდნენ ადგილობრივი თვითმმართველობის ორგანოების არჩევნებში მონაწილეობას, რადიკალურად შეცვალა.
„ეს მათი გადასაწყვეტია, როგორც უნდათ, სადაც უნდათ, ის გადაწყვეტილებები მიიღონ. ერთი რამ ცხადია, ჩვენი მთელი ამ დროის განმავლობაში ვისმენდით ძალიან პრინციპულ პოზიციას, რომ ისინი – არავინ არჩევნებში მონაწილეობის მიღებას არ აპირებდნენ. როგორც ჩანს, გარედან შეიცვალა მიდგომა, დამოკიდებულება, უთხრეს ვიღაცებს, რომ უნდა მიიღონ მონაწილეობა და ის პრინციპული პოზიცია, რაც ჰქონდათ, დღეს რადიკალურად შეცვალეს.
თუმცა, არსებითი მნიშვნელობა ამას არ აქვს, რამდენი პოლიტიკური პარტია ან პოლიტიკოსი მიიღებს არჩევნებში მონაწილეობას. ჩვენთვის მთავარი არის, რომ ჩვენ ვესაუბრებით ხალხს, ვისმენთ პრობლემებს, გამოწვევებს. მე თბილისის მაგალითზე შემიძლია, გითხრათ, რომ ყველა უბნის, რაიონის დონეზე დეტალურად ვიცით, თუ რა სჭირდება ქალაქს, რა არის საჭირო იმისთვის, რომ ის გამოწვევები დაიძლიოს და პრობლემებს გაეცეს ღირსეული პასუხი.
ხალხმა დაინახა ის, რომ ჩვენ შეგვიძლია საქმის კეთება, რასაც ვამბობთ, ვაკეთებთ. არის ისეთი საკითხები, სადაც გვაქვს პრობლემები. თუმცა, ამაზეც ღიად ვსაუბრობთ და არ გვერიდება. ეს არის ჩვენი ძალიან დიდი ძალა, რომ ხალხთან დღემდე ჩვენ არ გაგვიწყვეტია კომუნიკაცია. გვაქვს ყოველდღიური ურთიერთობა სხვადასხვა პროექტზე, გასაკეთებელ საქმეებზე და მოსაწესრიგებელ საკითხებზე, რომლებიც არსებობს დედაქალაქში”, – აღნიშნა დედაქალაქის მერმა.