გამიჭირდება ერთი კონკრეტული პროექტის გამოყოფა, გულწრფელად გეუბნებით, რომ პატარა ბავშვივით მიხარია ყველა გაკეთებული საქმე, ყველა განხორციელებული პროექტი, – განაცხადა გადაცემაში „იმედი LIVE“ თბილისის მერმა, „ქართული ოცნების“ გენერალურმა მდივანმა კახა კალაძემ.
მისივე თქმით, არაფერია იმაზე დიდი ბედნიერება, როდესაც მადლიერების სიტყვებს იღებ თანამოქალაქეებისგან.
„ძალიან მახარებს ეს ყველაფერი. ეს დამატებითი სტიმულია ჩემთვის, რომ კიდევ უფრო მეტი გავაკეთო, კიდევ უფრო მეტი ვიმუშაო ჩემს თანაგუნდელებთან ერთად.
ჩვენ მერიაში 30 ათასამდე თანამშრომელი გვყავს და მე მართლა ვამაყობ ამ ადამიანებით იმიტომ, რომ შეიძლება ღამის პირველი, ორი საათი იყოს, გუნდი მუშაობს სხვადასხვა საკითხებზე და ძალიან მაგარია ეს ყველაფერი. სხვანაირად შეუძლებელია. ჩვენს ქალაქში იმდენი პრობლემები გვაქვს, შეიძლება ბევრი ვერ ხედავს ამას, მაგრამ ჩვენგან ძალიან ბევრი ჩანს, რადგან დეტალურად ვიცით ყველა რაიონის საკითხები, პრობლემები შესწავლილი გვაქვს და რომ იტყვიან, პულსზე ხელი გვიდევს.
ბევრი კარგი საქმე გამოგვივიდა ბოლო წლების განმავლობაში. თუნდაც საზოგადოებრივი ტრანსპორტის განახლება, მოწესრიგება, რომელიც გრძელვადიანი პროცესია და მიმდინარეობს. შემდეგი ეტაპი არის მეტროს ვაგონების შესყიდვა. უკვე გვყავს გამარჯვებული კომპანია, რომელიც 2026 წლიდან დაიწყებს ახალი მეტროს ვაგონების მოწესრიგებას. მეტროს ყველაზე მეტი მგზავრი გადაჰყავს დღის განმავლობაში, უამრავ ადამიანს ემსახურება და გვინდა, რომ იყოს გამართული, მოწესრიგებული. ასევე, ევროპის რეკონსტრუქციისა და განვითარების ბანკთან ერთად ვმუშაობთ მეტროსადგურების განახლებაზე. უახლოეს მომავალში უკვე ტენდერს გამოვაცხადებთ, რომ სხვადასხვა უცხოური კომპანიები ჩაერთონ აღნიშნული პროექტის განხორციელებაში. ქართული კომპანიების თვალსაზრისით პრობლემები გვაქვს იმიტომ, რომ არ აქვთ გამოცდილება და ბევრს ეშინია პროექტების განხორციელების. მითუმეტეს მას შემდეგ, რაც ვარკეთილის მეტროში მოხდა. ევროპული კომპანიების ჩართულობა დაგვეხმარება პროცესები კიდევ უფრო წინ წავიდეს.
რეკრეაციული სივრცეები, რაც ასევე ძალიან მაგარია. ძალიან მიხარია, რომ საპარკო კულტურა შემოვიდა და დღეს ყველა რეაბილიტირებული სივრცე, პატარა სკვერიდან დაწყებული დიდი პარკებით დამთავრებული, გადავსებულია ადამიანებით. დიდი, პატარა, ძალიან მსიამოვნებს და ძალიან მიხარია, რომ ეს კულტურა შემოვიტანეთ“, – აღნიშნა კახა კალაძემ.