„არსებობს სამხარაულის ექსპერტიზის ეროვნული ბიუროს დასკვნა, სადაც ექსპერტი აღნიშნავს, რომ დაზიანებულია მზიდი კედლები და ყოველდღიურად საშიში ხდება აქ ადამიანების გაჩერება“, – განაცხადა აღსრულების პოლიციელმა ჯემალ ზურაშვილმა თვალჭრელიძის ქუჩაზე გამოსახლების პროცესის შესახებ მედიასთან.
მისივე თქმით, აღნიშნული საქმის სააღსრულებო წარმოება აღსრულების ეროვნულ ბიუროში დაიწყო 2024 წლის 11 ივნისს.
„მათ შორის, რა თქმა უნდა, განხორციელდა არაერთი ვიზიტი და გაფრთხილებულ იქნენ არაერთხელ აქ მცხოვრებნი. რაც ყველაზე მთავარია, აღნიშნული შენობები წარმოადგენს ავარიულ შენობებს. ამაზე, რა თქმა უნდა, არსებობს სამხარაულის ექსპერტიზის ეროვნული ბიუროს დასკვნა, სადაც ექსპერტი აღნიშნავს, რომ დაზიანებულია მზიდი კედლები და ყოველდღიურად საშიში ხდება აქ ადამიანების გაჩერება.
აღსრულების ეროვნული ბიუროს მხარეთა ინტერესების დაცვის დეპარტამენტის ჩართულობითაც თითოეულ ჯერზე შესწავლილ იქნა ყველა მათგანის საჭიროებები, მიმართულ იქნა შესაბამის უწყებებთან, ასევე, კრედიტორი მხარე გამოთქვამდა მზადყოფნას, სახელმწიფო უწყებებთან ერთად დახმარებოდა აღნიშნულ მისამართზე მცხოვრებ ხალხს სხვადასხვა ფართში ქირით გაყვანით.
რაც შეეხება გამოსახლების პროცესს, ორჯერ იყო უკვე ჩანიშნული, თუმცა, ისევ მხარეთა ინტერესების გათვალისწინებით და, მათ შორის, მოლაპარაკებების შესაძლო განხორციელების გამო ორივეჯერ გადაიდო. როგორც აღვნიშნე, დღეს უკვე არსებობს სამხარაულის დასკვნა და, შესაბამისად, აღსრულების ეროვნული ბიურო მოკლებულია შესაძლებლობას, შეაჩეროს ან გადადოს აღნიშნული სააღსრულებო მოქმედება“, – განაცხადა ჯემალ ზურაშვილმა.
