გორბის კვლევა ადასტურებს, რომ ქართულ ოცნებას საქართველოს მოსახლეობის უდიდესი ნაწილის მხარდაჭერა აქვს და შესაბამისად გვაქვს მოლოდინი და დარწმუნებულები ვართ, რომ 64-ვე მუნიციპალიტეტში თვითმმართველობის არჩევნების მიმდინარეობისას ჩვენ დამაჯერებელ გამარჯვებას მოვიპოვებთ, – განაცხადა იურიდიულ საკითხთა საპარლამენტო კომიტეტის თავმჯდომარემ, არჩილ გორდულაძემ.
მისი თქმით, საქართველოს მოსახლეობა აგენტურას არასდროს აირჩევს.
„რაც შეეხება ე.წ. ოპოზიციონერების შედეგებს, ფაქტია, რომ მათი შედეგები სულ უფრო და უფრო მცირდება, იმიტომ რომ ასეთია ქართველი ხალხის გადაწყვეტილება, ისინი აგენტურას არასდროს არ დაუჭერენ მხარს“, – აღნიშნა გორდულაძემ.
კითხვაზე, პარლამენტის არჩევნები ამ კვირას რომ ტარდებოდეს ვის მისცემდით ხმას შემდეგი პარტიებიდან? გამოკითხულთა 56,2% – მა „ქართულ ოცნება“ დაასახელა.
ტელეკომპანია „იმედის“ დაკვეთით საქართველოს საზოგადოებრივი აზრისა და ბიზნესის კვლევის საერთაშორისო ცენტრმა „გორბიმ“ საზოგადოებრივი აზრის კვლევა თბილისისა და ქვეყნის მასშტაბით, პირისპირი ინტერვიუირების მეთოდის გამოყენებით ჩაატარა.
საველე სამუშაოები 2025 წლის 22 ივნისი-5 ივლისს შესრულდა. შედგა 2300 პირისპირი ინტერვიუ საქართველოს ზრდასრულ მოქალაქესთან (18 წლის და მეტი ასაკის).
წარმოდგენილი მონაცემები შეწონილია როგორც დემოგრაფიული, ასევე პოლიტიკური წონით (2024 წლის საპარლამენტო არჩევნებში გაცხადებული ხმის მიცემის და ოფიციალური შედეგების თანაფარდობით) და წარმოდგენილია სავარაუდო ამომრჩევლის ჭრილში.
სავარაუდო ამომრჩეველი გამოვლინდა არჩევნებში მონაწილეობის მზაობასთან დაკავშირებულ შეკითხვებზე გაცემული პასუხებიდან გამომდინარე. ცდომილების ზღვარი: +/-3% სავარაუდო ამომრჩეველი, ქვეყნის მასშტაბით.