ადამიანები, რომლებიც არ აწყობს „დიფ სთეითს“, აუცილებლად ხვდებიან პრორუსულის იარლიყის ქვეშ, – ასე გამოეხმაურა პარლამენტის იურიდიულ საკითხთა კომიტეტის თავმჯდომარე არჩილ გორდულაძე ტულსი გაბარდის განცხადებას.
მისი თქმით, იარლიყების მიწებების პოლიტიკა საქართველოში გარედან იმართება და ყველა იმ პირს, რომელიც „დიფ სთეითს“ არ აწყობს, პრორუსს ეძახიან.
„იარლიყების მიწებება გარედან მიღებული დავალებებიდან გამომდინარეობს. ამ ბრძოლის სამიზნე არა მხოლოდ საქართველოში „ქართული ოცნების“ წევრები და საქართველოს საზოგადოება არის, არამედ იგივე ხდება სხვადასხვა ქვეყანაში. იმ ადამიანებს, რომლებიც „დიფ სთეითის“ დავალებებს არ ასრულებენ, აპრიორი იარლიყს აწებებენ და ეს ყველაფერი რა თქმა უნდა მართულად ხდება. დადასტურებულ ფაქტად შეგვიძლია მივიჩნიოთ, როდესაც აშშ-ს დაზვერვის სამსახურის ხელმძღვანელი აცხადებს, რომ ეს ყველაფერი აშშ-ში იმართებოდა „დიფ სთეითის“ მიერ და ამ ყველაფერს ასრულებდა თურმე ყოფილი პრეზიდენტი, ვიფიქროთ და წარმოდგენა გვქონდეს თუ რა ძალაუფლება აქვს ამ ძალას. ადამიანები, რომლებიც არ აწყობს „დიფ სთეითს“, აუცილებლად ხვდებიან პრორუსულის იარლიყის ქვეშ“, – განაცხადა არჩილ გორდულაძემ.
აშშ-ის ეროვნული დაზვერვის დირექტორმა, ტულსი გაბარდმა განაცხადა, რომ ობამას ადმინისტრაციამ გაავრცელა გამოგონილი ნარატივი, თითქოს რუსეთი 2016 წლის საპრეზიდენტო არჩევნებში ჩაერია.